Эрон бош мураббийи: «Жаҳон чемпионатида энг кўп жабр кўрган жамоа биз бўлсак керак»
Жамоа Янги Зеландияга қарши баҳсдан сўнг Мексикага қайтишга мажбур қилинган.
Эрон терма жамоаси бош мураббийи Амир Галанои Янги Зеландияга қарши 2:2 ҳисобидаги дурангдан кейин жамоа учун ўрнатилган ташкилий чекловлардан норозилигини билдирди.
Унинг айтишича, жамоа ўйиндан сўнг Лос-Анжелесда тунаб қолмоқчи бўлган, аммо бунинг ўрнига улардан дарҳол Мексикага қайтиш талаб қилинган.
«Биз куч тўплаш учун бугун кечқурун шу ерда қолишимиз ва эртага тушлик вақтида қайтишимиз керак эди, лекин бизга рухсат беришмади. Тўғрисини айтсам, бунинг сабабини мутлақо билмайман. Менимча, бизнинг жамоамиз бутун Жаҳон чемпионатидаги энг кўп жабр кўрган жамоа бўлса керак», — деди Галанои.
АҚШ визалари билан боғлиқ ноаниқликлар ва хавфсизлик омиллари сабаб Эрон футбол федерацияси Жаҳон чемпионати бошланишидан аввал жамоанинг йиғин базасини АҚШниниг Аризона штатидан Мексиканинг Тихуана шаҳрига кўчиришга қарор қилган эди.
Натижада футболчилар ҳар бир ўйин учун Мексикадан АҚШга учиб келишга мажбур бўлмоқда.
Тареми: «Бу футбол учун ҳам яхши эмас»
Эрон терма жамоаси ҳужумчиси Меҳди Тареми ҳам вазиятдан норози эканини билдирди.
«Бу биз учун яхши эмас. Менимча, бу футбол учун ҳам яхши эмас. ФИФА бизга кўпроқ ёрдам бериши керак. Бу жуда ёмон ва жамоамизга салбий таъсир кўрсатмоқда, биз фақат тинчликни хоҳлаймиз», — деди Тареми.
