Путин Европага яна Россия нефт ва газини сотиб олишни таклиф қилди
Россия Эрон атрофидаги инқироз сабабли Европага энергия ресурслари етказиб беришни қайта тиклашга тайёр: Владимир Путин жаҳон бозоридаги вазият бўйича ўтказилган йиғилишда Европа компаниялари билан ҳамкорлик қилиш имкониятини эълон қилди.
Душанба куни Кремлда ҳукумат аъзолари ва Марказий банк раҳбари иштирокида ўтган мажлисда Путин Россия ҳеч қачон Европага нефт ва газ сотишдан воз кечмаганини таъкидлади.
«Агар Европа компаниялари сиёсий конъюнктурадан холи бўлган узоқ муддатли ва барқарор ҳамкорликка қайтишга қарор қилса, биз ишлашга тайёрмиз», — деди Путин.
Ҳозирда Россия Европа Иттифоқидаги сўнгги мижозлари бўлган Венгрия ва Словакияга етказиб беришни давом эттирмоқда, шунингдек, «ишончли контрагентлар» билан экспорт ҳажмини оширмоқда.
Путиннинг фикрича, Эрондаги уруш ва дунё нефт савдосининг учдан бир қисми ўтадиган Ҳўрмуз бўғозининг блокланиши халқаро иқтисодий алоқалар тизимига қаттиқ зарба беради. Бу жараён инфляция ўсишига, ишлаб чиқаришнинг пасайишига ва энергия бозорларида «янги нарх воқелиги» юзага келишига олиб келади. Унинг прогнозига кўра, Ҳўрмуз бўғозига боғланиб қолган нефт қазиб олиш яқин бир ой ичида бутунлай тўхтаб қолиши мумкин.
Россия учун имконият
Путин Россия энергетика компаниялари ҳар доим етказиб беришда барқарорлик ва ишончлилик билан ажралиб турганини қайд этди. Душанба куни «Brent» маркали нефт нархи баррелига 119 долларгача кўтарилган бир шароитда, Россия раҳбарияти маҳаллий компанияларга қўшимча экспорт тушумларидан банклар олдидаги қарздорликни камайтириш учун фойдаланиш зарурлигини уқтирмоқда.
Энергетика бозоридаги вазият
Яқин Шарқдаги нефт ва газни тезкорлик билан алмаштиришнинг иложи йўқлиги сабабли, Россия ўз ресурсларини Европа учун муқобил ечим сифатида таклиф қилмоқда.
Жаҳон иқтисодиёти Ҳўрмуз бўғозининг ёпилиши оқибатида юзага келадиган энергия танқислигига тайёргарлик кўраётган бир пайтда, Москва ушбу инқирозни Европа бозорига қайтиш учун қулай фурсат деб баҳоламоқда.
