Теҳрон Вашингтонга жавоб берди: уруш тақдирини Эрон ҳал қилади

Ислом инқилоби муҳофизлари корпуси (ИИМК) АҚШ президенти Доналд Трампнинг Эрон билан уруш тез орада тугаши ҳақидаги сўзларига кескин муносабат билдирди.

ИИМКнинг жавоби

«Уруш қачон тугашини айнан биз ҳал қиламиз. Жанг майдонидаги шартлар ва урушнинг якуни Ислом Республикаси қўлида», — дейилади 9-март куни «Tasnim» агентлиги томонидан тарқатилган баёнотда.

Аввалроқ Трамп Эронга қарши уруш кутилганидан анча тезроқ якунланиши мумкинлигини айтган эди.

«Менимча, уруш амалда тугади. Уларда на флот, на алоқа тизимлари ва на ҳарбий-ҳаво кучлари қолди», — деди АҚШ президенти.

Шунингдек, у уруш режадан анча илгарилаб кетганини даъво қилган.

Феврал ойи охирида Трамп уруш тўрт-беш ҳафта давом этиши ҳақида гапирган бўлса, ўтган ҳафта охирида Оқ уй матбуот котиби Каролайн Ливитт бу муддат тўрт-олти ҳафта бўлиши мумкинлигини қайд этди.

Эрон: АҚШ билан музокаралар бўлмайди

Эрон Ташқи ишлар вазири Аббос Арақчий Эрон ракета зарбаларини «қанча керак бўлса, шунча» давом эттиришини маълум қилди.

9-март куни «PBS News» телеканалидаги чиқишида у мамлакатга зарбалар берилаётганини, аммо Эрон бунга «тайёр» эканини айтди.

«Биз уларга ракеталаримиз билан қанча керак бўлса, шунча ҳужум қилишга тўлиқ тайёрмиз», — деб таъкидлади Арақчий.

Эрон вазири АҚШ билан янги музокаралар ўтказиш имкониятини инкор этди. Унинг сўзларига кўра, Теҳрон «америкаликлар билан музокаралар борасида жуда аччиқ тажриба орттирган». Шу боис, вазир яқин истиқболда Вашингтон билан музокаралар ўтказилиши кун тартибидан жой олишини кутмаяпти.

Минтақадаги можаро

АҚШ ва Исроил феврал ойи охирида Эронга ҳаво зарбаларини беришни бошлаган эди. Ушбу ҳужумлар давомида олий раҳнамо Оятуллоҳ Али Хоманаий ва Эрон раҳбариятининг бошқа аъзолари ўлдирилди. Теҳрон бунга жавобан Исроилга, Форс кўрфазининг бир қатор давлатларига ва минтақадаги Америка объектларига зарбалар берди. Уруш бошланишидан олдин АҚШ ва Эрон ядровий дастур бўйича музокаралар олиб бораётган эди, бироқ сезиларли натижага эришилмаганди.