АҚШ Мадуро ҳокимиятини ағдариш учун 3 соату 20 дақиқа сарфлади
Тунги ҳарбий оператсиядан кейин Мадуронинг қўлга олинганлиги ҳақидаги баёнот Венесуэладаги узоқ йиллик ҳокимият инқирозини янги босқичга олиб чиқди.
АҚШ президенти Дональд Трамп Венесуэлада тун давомида амалга оширилган ҳарбий зарбалар натижасида мамлакат раҳбари Николас Мадуро қўлга олинганини эълон қилди. Унинг айтишича, операция муваффақиятли якунланган ва Мадуро рафиқаси билан бирга Венесуэла ҳудудидан олиб чиқилган. Трамп бу ҳақда Truth Social ижтимоий тармоғида маълум қилди.
Баёнотда АҚШ Венесуэлага қарши кенг кўламли зарба бергани, амалиёт АҚШ ҳуқуқни муҳофаза қилувчи органлари билан ҳамкорликда ўтказилгани таъкидланган. Президент қўшимча тафсилотлар Флорида штатидаги Мар-а-Лаго қароргоҳида ўтказиладиган матбуот анжуманида маълум қилинишини айтган.
Reuters агентлигига маълум қилган АҚШ расмийларига кўра, Мадуро элита Delta Force махсус бўлинмалар томонидан қўлга олинган. Вашингтон сўнгги йилларда Венесуэла раҳбарини наркотрафикни қўллаб-қувватлаш, давлатни «нарко-давлат» сифатида бошқариш ва сайловларни сохталаштиришда айблаб келган.
Венесуэлага бўлган ҳужум АҚШнинг Лотин Америкасида 1989 йилда Панамага киритилган ҳарбий амалиётдан бери энг очиқ ва тўғридан-тўғри аралашуви сифатида баҳоланмоқда.
Ўшанда Панама етакчиси Мануэл Норьега ҳокимиятдан ағдарилган эди.
Венесуэла ҳукумати Мадуронинг қўлга олингани ҳақида расмий тасдиқ бермади.
Бироқ мамлакат мудофаа вазири Владимир Падрино давлат телевидениесида чиқиш қилиб, хорижий қўшинлар ҳаракатини кескин қоралади. У Венесуэла суверен ва мустақил давлат эканини таъкидлаб, аҳолини бирлашиш ва қаршилик кўрсатишга чақирди.
Кузатувчиларга кўра, мазкур воқеа Венесуэладаги ички сиёсий инқирозни янада чуқурлаштириши, шунингдек, минтақада геосиёсий кескинликни кучайтириши мумкин. Дунёдаги энг йирик нефть захираларига эга бўлган Венесуэла атрофидаги бу беқарорлик халқаро энергетика бозорларига ҳам жиддий таъсир кўрсатиши эҳтимол қилинмоқда.
