9 ой ичида транспорт соҳасидаги 544 млрд сўмлик ортиқча харажатнинг олди олинди
Транспорт прокуратурасининг қурилиш штаби давлат дастурлари доирасида 2026-йилда таъмирланиши белгиланган 37 та объектнинг лойиҳа-смета ҳужжатларини ўрганиб чиқди.
© vaqt.uzЎзбекистонда 2026-йилнинг январ-сентябр ойларида транспорт соҳасидаги қурилиш ва таъмирлаш лойиҳаларида 544,2 млрд сўмлик маблағнинг ортиқча сарфланишига йўл қўйилмади. Шунингдек, соҳада аниқланган жиддий қонунбузилишлар юзасидан 97 та жиноят иши қўзғатилган. Бу ҳақда Транспорт прокурорининг жамоатчилик билан алоқалар ва ҳуқуқий ахборот бўйича катта ёрдамчиси Ҳулкар Мансурова маълум қилди.
Қайд этилишича, Транспорт прокуратурасининг қурилиш штаби томонидан давлат дастурларига киритилган ҳамда жорий йилда қурилиш-таъмирлаш ишлари бошланадиган 37 та объектнинг лойиҳа-смета ҳужжатлари ўрганилган. Ушбу назорат тадбирлари натижасида юқорида кўрсатилган 544,2 миллиард сўм миқдоридаги ортиқча харажатларнинг олди олинган.
«Ташаббусли бюджет» лойиҳалари ва прокурор назорати
Шунингдек, «Ташаббусли бюджет» дастурининг 2026 йилги биринчи мавсумида ғолиб деб топилган 945 та лойиҳа доирасида ҳам ўрганишлар олиб борилган.
Мазкур лойиҳалар орқали 2501 километр ички йўлни қуриш ва таъмирлаш учун бюджетдан 1 триллион 494 миллиард сўм ажратилган бўлиб, ҳозирга қадар 821 та объектда қурилиш ишлари якунланган ва фойдаланишга топширилган. Қолган 124 та объектда қурилиш-монтаж ишлари давом этмоқда.
Мазкур дастур доирасидаги назорат тадбирлари орқали яна 61 миллиард 567 миллион сўмлик ортиқча харажатнинг олди олинган. Фойдаланишга топширилмаган 52 та объект бўйича эса буюртмачилар томонидан судларга 5,9 миллиард сўмлик жарима ундириш юзасидан даъво аризалари киритилган.
Ҳисобот даврида Транспорт прокуратураси томонидан жами 3350 та прокурор назорати ҳужжати қўлланилган. Прокуратуранинг назорат ҳудудида қайд этилган жиноятлар сони ўтган йилнинг мос даврига нисбатан 15 фоизга камайган бўлиб, жиноятлар оқибатида етказилган 62 млрд 711 миллион сўмлик зарар тўлиқ ундирилган.
Прокурор назорати натижасида 655 нафар шахс интизомий, 643 нафари маъмурий жавобгарликка тортилган. Бундан ташқари, 1067 нафар фуқаро ва 62 та юридик шахснинг бузилган ҳуқуқлари тикланган.
Темирйўлларда хавфсизликни таъминлаш мақсадида ўтказилган рейд тадбирларида 23 минг 517 та маъмурий ҳуқуқбузарлик ҳолати аниқланган. Қоидабузарларга нисбатан баённомалар расмийлаштирилиб, 1 млрд 661 млн сўмдан ортиқ жарима тайинланган.
Инвестиция лойиҳалари ижросига келадиган бўлсак, тўққиз ойда транспорт соҳасида 743,5 млон доллар хорижий инвестиция ўзлаштирилиб, белгиланган режа 106 фоизга бажарилган.
