«Anthropic» лаборатория очди: «Claude» энди биологик тажриба ўтказади

Аксарият сунъий интеллект компаниялари фақат дастурий моделларни ривожлантириш билан банд бўлган бир пайтда, «Anthropic» амалий биологик тадқиқотлар ўтказиладиган марказ ташкил қилди. Компаниянинг ҳаёт ҳақидаги фанлар бўлими раҳбари Эрик Каудерер-Абрэмс янги лаборатория иш бошлаганини «Reuters» агентлигига тасдиқлаган. Унинг қайд этишича, биология йўналишида ҳақиқий лаборатория синовлари ҳамон энг муҳим ва якуний босқич бўлиб қолмоқда.

Нашр маълумотларига кўра, Сан-Франсискода ташкил этилган ушбу лаборатория ёрдамида компания биология соҳасидаги изланишларни эндиликда фақат компютердаги ҳисоб-китоблар билан чекламай, амалий тажрибалар орқали ҳам синовдан ўтказмоқда.

«Anthropic» лабораторияда нима билан шуғулланяпти?

Эрик Каудерер-Абрэмсга кўра, янги лаборатория ички тадқиқотларни ташқи ҳамкорлар билан биргаликдаги ишлар билан уйғунлаштиради. У мазкур ёндашувни биотехнология компанияларидаги тажрибага қиёслаган.

«Reuters» маълумотига кўра, «Anthropic» лаборатория жараёнларини «Claude» сунъий интеллект тизими ёрдамида автоматлаштириш устида иш олиб бормоқда. Компаниянинг бош мақсади — биологияда сунъий интеллект имкониятларидан фақат маълумотларни таҳлил қилишда эмас, балки амалий тажриба жараёнларида ҳам кенг фойдаланишдан иборат.

Шу билан бирга, «Anthropic» вакили муҳим бир жиҳатга аниқлик киритди: мазкур лаборатория айнан янги дори воситаларини яратиш мақсадида ташкил этилмаган. Компания унинг аниқ вазифалари хусусида қўшимча тафсилотларни очиқламаган.

Шунга қарамай, «Reuters» хабарида «Anthropic» ҳаёт ҳақидаги фанлар йўналишида кам ўрганилган ҳамда кам учрайдиган касалликларни даволаш йўлларини излашни ўз олдига мақсад қилиб қўйгани айтилган.

«Claude»нинг биологиядаги роли кенгаймоқда

Сўнгги ойларда «Anthropic» компанияси фанлар соҳасида сунъий интеллект имкониятларини бир неча йўналишда кенгайтирди.

Жумладан, компания 2026 йилнинг июн ойида илмий тадқиқотларга мўлжалланган «Claude Science» платформасини тақдим этган эди. Қайд этилишича, мазкур тизим тадқиқотчилар учун турли воситаларни ягона муҳитда жамлаш, ҳисоблаш ресурсларидан оқилона фойдаланиш ва текшириш мумкин бўлган ишончли натижаларни тайёрлаш имконини беради.

Август ойида эса компания «Claude» моделининг оқсил дизайни ва аналитик кимёдаги салоҳиятини синовдан ўтказди. «Anthropic»нинг таъкидлашича, тизим 15 та турли мақсад учун нолдан бошлаб оқсил боғловчиларини яратиш жараёнига жалб қилинган ва уларнинг 14 тасида муваффақиятли натижа қайд этилган.

Шунингдек, 17 сентябр куни «Anthropic» ҳаёт ҳақидаги фанлар мутахассислари учун «Life Sciences Verification Program» махсус дастурини ишга туширди. Таъкидланишича, ушбу дастур орқали «Mythos», «Opus» ва «Sonnet» моделларидан биологияга оид вазифаларда, хавфсизлик талабларига мослаштирилган ҳолда фойдаланиш мумкин. Мазкур дастур доирасида янги дори воситаларини кашф қилиш, биологик тадқиқотлар, клиник ишланмалар ва ишлаб чиқариш каби муҳим йўналишлар қамраб олинган.

Компания нега амалий лаборатория ишига ўтди?

«Anthropic» раҳбарияти биология соҳасида фақат компютер моделлари билан чекланиш етарли эмаслигини таъкидламоқда.

Хусусан, Эрик Каудерер-Абрэмс «Reuters» агентлигига берган интервюсида реал лабораториядаги амалий ишлар биология соҳаси учун «якуний синов» бўлиб қолишини таъкидлаган. Шу билан бирга, у «Anthropic» айрим тадқиқотларни ўз лабораторияларида олиб бораётган бўлса, қолганларини ташқи ҳамкорлар билан биргаликда амалга ошираётганини қўшимча қилган.

Компаниянинг ўзи эса сунъий интеллектнинг илмий тадқиқотлардаги ўрнини кенгайтиришни алоҳида йўналиш сифатида кўрсатмоқда. Шунингдек, жорий йилнинг август ойида «Anthropic» дунё бўйлаб олимларнинг «Claude» моделидан фойдаланиш имкониятини ошириш мақсадида қўшимча 10 мингта ўрин очишини маълум қилди.

Бундан ташқари, 17 сентябр куни компания биомолекуляр моделлаштириш йўналишида яна бир муҳим натижани эълон қилди. «Anthropic» хабарига кўра, «Claude» тизими қарийб тўрт ҳафта ичида 30 дан ортиқ очиқ кодли моделни оптималлаштиришга эришиб, уларнинг ишлаш тезлигини ўртача тўрт баробаргача оширган.

Бу ҳали дори ишлаб чиқаришни англатмайди

Гарчи «Anthropic» компанияси биология соҳасига кириб бораётган бўлса-да, унинг лабораторияси тўғридан-тўғри дори воситаларини ишлаб чиқарувчи фабрика ҳисобланмайди.

«Reuters» агентлигининг ёзишича, компания лабораторияси махсус равишда янги дори воситаларини кашф қилишга мўлжалланмаган. Шунингдек, «Anthropic» ҳозирча ҳеч қандай клиник синовлар ўтказмаётганини ва ўзини фармацевтика компанияларига тўғридан-тўғри рақобатчи сифатида кўрмаслигини маълум қилган.

Ҳозирги босқичда «Anthropic» ўзининг сунъий интеллект моделларини назарий тадқиқотлардан реал биологик тажрибаларга яқинлаштирмоқда. Компаниянинг «Claude Science», «Life Sciences Verification Program» дастурлари ҳамда амалий лабораториясини айнан шу йўналишда ташланган қадамлар сифатида кўриш мумкин.