Доллар урушдан ютди, аммо тезда позицияларини йўқотиши мумкин – «Reuters»
Яқин Шарқда уруш бошланганидан бери доллар мустаҳкамланган бўлса-да, АҚШ активларининг «хавфсиз паноҳ» мақомига доир шубҳалар сақланиб қолаётгани сабаб бу ўсиш қисқа муддатли бўлиши мумкин.
Таҳлилчилар прогнози
«Reuters» томонидан ўтказилган ойлик тадқиқотда иштирок этган 60 нафар таҳлилчининг медиан прогнозига кўра, доллар умуман олганда янада заифлашиши кутилмоқда.
Таҳлилчилар фикрича, март ойи охиригача доллар еврога нисбатан тахминан 2 фоизга қадрсизланиб, 1,18 долларга тушиши мумкин. Кейин эса уч ой ичида 1,19 долларгача, олти ойдан сўнг эса 1,20 долларгача мустаҳкамланиши прогноз қилинмоқда. «Reuters» қайд этишича, бу баҳолар ўтган ойдаги прогнозлардан деярли ўзгармаган.
Агентлик таъкидлашича, бир йиллик прогнозлар юқори ноаниқликни акс эттирмоқда. Медиан баҳога кўра, евро бир йил ичида 1,21 долларгача мустаҳкамланиши мумкин. Бироқ прогнозлар орасидаги фарқ тахминан 18 центни ташкил этади – бу «Reuters» сўровларида октябр ойидан бери энг кенг диапазонлардан бири ҳисобланади.
Март ойи охиригача бозор позициялари қандай ўзгариши ҳақидаги саволга жавоб берган валюта стратегларининг қарийб ярми (45 нафардан 21 нафари) сезиларли ўзгаришлар бўлмаслигини ёки долларга қарши қисқа позициялар ҳажми ҳатто ошишини айтган. 19 нафар респондент эса соф қисқа позициялар қисқаришини тахмин қилган, фақат беш нафар таҳлилчи соф узун позицияларга ўтишни прогноз қилган.
«Rabobank» банки валюта стратегияси раҳбари Жейн Фолининг айтишича, улар ўз позициясини ўзгартирмаган.
«Биз бу йил евро-доллар жуфтлиги ва долларга боғлиқ бошқа кросс-курслар бўйича волатил ва нотекис динамикани кутмоқдамиз. Аммо доллар аввалгидек хавфсиз активми? Эҳтимол, йўқ. Акс ҳолда, сўнгги бир ярим йил давомида бу масалани муҳокама қилмаган бўлар эдик», – дейди у.
«Citi» банкининг «G10 FX» бўлими раҳбари Дэн Тобон эса АҚШ иқтисодиёти, айниқса меҳнат бозорининг келажак ривожи борасида ноаниқлик жуда катта эканини таъкидлади.
«Мумкин бўлган сценарийлар диапазони жуда кенг. Айнан шу ноаниқлик ҳозирча евро–доллар жуфтлигини нисбатан тор савдо диапазонида ушлаб турибди», – дейди у.
Тобон умумий консенсусга қарши фикр билдирган кам сонли таҳлилчилардан бири бўлиб, у аксинча, доллар мустаҳкамланишини кутмоқда.
Доллар билан нима содир бўлмоқда?
2-март куни доллар тахминан 1,5 фоизга мустаҳкамланди. «Reuters» таъкидлашича, бу асосан долларга қарши очилган қисқа позициялар ёпилиши ҳисобидан содир бўлган. Ҳаракатнинг асосий катализатори эса нефт нархларининг кескин ўсиши бўлган.
Бироқ 4-март куни «The New York Times» нашри Эрон вакиллари АҚШ ва Исроил билан урушни тугатиш шартларини муҳокама қилишни таклиф қилгани ҳақида хабар берганидан кейин доллар қарийб бир ой ичидаги энг кескин пасайишни кўрсатди. Шу фонда «Bloomberg» агентлиги ҳисоблайдиган «Bloomberg Dollar Spot» индекси (долларнинг асосий жаҳон валюталари саватига нисбатан курси) 0,4 фоизга тушди, гарчи кейинчалик қисман тикланган бўлса-да.
«Reuters» қайд этишича, долларнинг мустаҳкамланиши классик «ҳимоя активларига қочиш» ҳолатига ўхшамайди. Чунки 28-феврал куни уруш бошланишидан олдин бозор иштирокчилари АҚШ валютаси бўйича катта ҳажмда қисқа позициялар эгаллаб турган.
«JPMorgan» валюта стратеглари ҳам бу тенденцияга эътибор қаратган.
«Икки ҳафта олдин капитал оқимлари ҳақидаги маълумотларимизда левереджнинг камайишига доир сигналлар пайдо бўлаётганини айтган эдик. Бу эҳтимол АҚШ ва Эрон атрофидаги хавфлар билан қисман боғлиқ бўлиши мумкин. Шунинг учун душанба куни бу каби позициялар ёпилиши бизни ҳайратга солмади», – дейилади уларнинг баёнотида.
Уларнинг таъкидлашича, агар долларга қарши қисқа позициялар кенг кўламда ёпилиб, нейтрал даражага қайтса, бу валютага ҳозирги даражалардан қўшимча 1,5–2 фоиз атрофида қўллаб-қувватлаш бериши мумкин. Бироқ бу кўп жиҳатдан янги можаронинг қандай ривожланишига боғлиқ бўлади.
