Россияда 7-қаватдан тушиб кетган болани қутқариб қолган ўзбекистонлик тақдирланди

Россиянинг Санкт-Петербург шаҳрида содир бўлган фавқулодда ва мураккаб вазиятда ўз жони ва саломатлигини хавф остига қўйиб, кўп қаватли уйнинг юқори қисмидан қулаб тушаётган ёш болага амалий ёрдам кўрсатгани ва унинг ҳаётини сақлаб қолгани, ўзбек халқига хос юксак жасорат, қаҳрамонлик ва фидойилик фазилатларини яққол намоён этгани учун Ибадуллаев Хайрулло Сайдуллаевич «Жасорат» медали билан мукофотланди.

78.ru нашрига кўра, кўп қаватли уйнинг 7-қаватидан қулаган бола очиқ дераза токчасида (карниз) ўтириб, планшет ўйнаётган пайтда мувозанатни йўқотиб, токчага илиниб қолган. Шу пайт Хайрулло Ибодуллаев болани йиқилишидан аввал пайқаб, унга ойнадан узоқлашишни бақириб айтган. Бола карнизга осилиб туришга кучи етмай, қўлларини қўйиб юборган пайтда эркак уни ушлаб қолган.

эркак болани подъездга олиб кириб, ҳушига келтиришга уринган. Кўп ўтмай уни тез ёрдам олиб кетган. Боланинг онаси ҳодиса пайтида ошхонада бўлган. Унинг айтишича, ўғли аутизмга чалинган, махсус инклюзив марказга қатнайди, спорт билан шуғулланади ва дефектолог билан ишлайди. Авваллари ҳам у хонада ёлғиз қолган ҳолатлар бўлган, аммо ҳеч қачон ойнани очмаган. Аёл боланинг йўқолганини тахминан 10 дақиқадан кейин пайқаган.

Сўнгги маълумотларга кўра, бола реанимация бўлимида бўлиб, аҳволи барқарор. У бир нечта жойидан жароҳатланган, жумладан оёқ қисмида синишлар бор, шунингдек, ички аъзолари шикастланган. Ўзбекистонлик ҳам жабрланган — унинг қўл панжалари ва қовурғалари синган.

Маълум қилинишича, болани қутқариб қолган ўзбекистонлик Хайрулло Ибодуллаев 36 ёшда бўлиб, Санкт-Петербургда Петрозаводская кўчасидаги уйга ҳам хизмат кўрсатадиган пудрат ташкилотида ишлайди.

Унинг сўзларига кўра, дераза токчасида турган болага уй ичига қайтишни бақириб айтган, аммо бола уни эшитмаган. Бола ойнадан қулаган пайтда эркак уни ушлаб қолган, шу вақтда боланинг оёқлари унинг кўкрак қисмига урилган. Эркак ҳам йиқилган.

Шундан сўнг у боланинг нафас олиши қийинлашгани сабабли унга массаж қилишга уринган. Хайрулло Ибодуллаев ёрдам чақирган, консерж эшикни очган. Бола тез ёрдам келгунига қадар унинг хонасида бўлган.

«Агар боланинг аҳволи яхши бўлса, мен ҳам яхши бўламан», — деди Ибодуллаев.

Телеканал маълумотига кўра, у Санкт Петербургга Ўзбекистондан тўрт ой аввал келган. Унинг тўрт нафар фарзанди ва бемор ота-онаси Ўзбекистонда қолган. Ибодуллаев уларни таъминлаш учун ишлаётганини, шунингдек, автомобил сотиб олишни орзу қилишини айтган.