17 ёшли мактаб ўқувчиси 600 минг долларлик гашиш билан ушланди

Тошкент вилоятининг Чирчиқ шаҳрида 17 ёшли мактаб ўқувчиси Россиядан юборилган 852,2 грамм гашишни қабул қилиб олаётган вақтда қўлга олинди. Бу ҳақда Давлат божхона қўмитаси хабар қилди.

Ўтазилган тезкор тадбирда 2009-йилда туғилган, яъни вояга етмаган шахс Россиядан юборилган жўнатмани қабул қилиб олаётган вақтида қўлга олинган.

Жўнатма холислар иштирокида очиб кўрилганида, унинг ичидаги 4 дона консерва қутиларига 852,2 грамм гашиш гиёҳвандлик воситаси яширилгани аниқланган.

Шунингдек, ўсмирнинг яшаш хонадони кўздан кечирилганда, у ердан электрон тарозилар, наркотик моддаларни тарқатишга мўлжалланган «зип» пакетчалари ҳамда изолентлар топилиб, ашёвий далил сифатида олиб қўйилган. Бохжона маълумотига кўра, 852,2 грамм гашиш ўрта ҳисобда 60 минг дозадан ошади. Ушбу ҳажмдаги наркотик модданинг қора бозордаги қиймати салкам 600 минг долларни ташкил қилади. Ҳозирда ҳолат юзасидан жиноят иши қўзғатилган.