«Бутун Россияга эмас, фақат Москвага зарба бериш керак» — «Фламинго» бош конструктори
Украинанинг «Фламинго» қанотли ракеталарини ишлаб чиқарувчи «Fire Point» компанияси бош конструктори Денис Штилерман Россия раҳбариятини шокка туширишнинг ягона йўлини маълум қилди.
«Fire Point» мудофаа компанияси раҳбари Денис Штилерман блогер Денис Казанскийга берган интервюсида Украина Россиянинг бутун ҳудудига куч сарфламасдан, бор эътиборни Москвадаги ҳарбий ва нефт инфратузилмасига қаратиши лозимлигини таъкидлади. Унинг фикрича, фақатгина пойтахтга бериладиган мунтазам зарбалар Россия элитасига таъсир қила олади.
Конструкторнинг фикрича, Россия раҳбарияти учун мамлакатнинг бошқа ҳудудларида нима бўлаётгани аҳамиятсиз.
«Бу зарбалар Россия тепасидагиларда таассурот қолдириши учун улар фақат Москва ичида — Рублёвка ва Москвада содир бўлиши керак», — деди Штилерман.
Ракета ишлаб чиқариш ва янги технологиялар
«Fire Point» компанияси ҳозирги кунда кунига учта «Фламинго» ракетасини ишлаб чиқариш қувватига эга. Мутахассиснинг сўзларига кўра, компания ўз двигателини яратиш жараёнини якунламоқда ва шундан сўнг ишлаб чиқариш ҳажми чекланмайди.
Аввалроқ ракеталар учун маҳаллий АИ-25 ёки АИ-25ТЛ двигателлари ишлатилган бўлиб, улар учинчи давлатлар орқали яширинча сотиб олинган.
Янги реактив двигател паст баландликда учиш учун оптималлаштирилган ва икки контурли турбореактив тизимга асосланган.
Штилерманнинг таъкидлашича, Украина ўз двигателига ўтгандан сўнг, буюртмалар сони қанча бўлса, шунча ракета етказиб бериш имкониятига эга бўлади. Бу эса Москвага қилинадиган ҳужумларнинг интенсивлигини ошириши мумкин.
«Фламинго» — узоқ масофага (3000 км.гача) учувчи Украина қанотли ракетаси бўлиб, у «Fire Point» хусусий компанияси томонидан ишлаб чиқилган ва 2025-йилнинг августида тақдимот қилинган. Ердан учирилувчи бу ракетанинг оғирлиги 6 тонна атрофида, 1000 кг оғирликдаги жанговар каллакни ташийди ва йирик объектларни йўқ қилишга мўлжалланган.
