Logo

Radarlarni tekshirayotgan YHXX, go‘sht va benzin narxidan norozi aholi va amfiteatrga sarflanadigan 7 mlrd so‘m — 16-noyabr dayjesti

Kecha 23:204 daqiqa

Kun davomida O‘zbekistonda yuz bergan voqealar va hodisalar, yoritilgan yangiliklar va xabarlarning eng muhimlarini yana bir bor esga olamiz.

Radarlarni tekshirayotgan YHXX, go‘sht va benzin narxidan norozi aholi va amfiteatrga sarflanadigan 7 mlrd so‘m — 16-noyabr dayjesti

Aholining 90,7 foizi kamida umumiy o‘rta ma’lumotga ega – Statistika qo‘mitasi

2026 yilgi aholini ro‘yxatga olish natijalariga ko‘ra, O‘zbekistonda 15 yosh va undan katta aholi soni 27 million 174,1 ming kishini tashkil etib, ularning 90,7 foizi kamida umumiy o‘rta ma’lumotga ega. Milliy statistika qo‘mitasi ma’lumotlarida qayd etilishicha, oliy va oliy ta’limdan keyingi ma’lumotga ega aholi 3 million 271,1 ming kishiga yoki jami aholining 12 foiziga teng bo‘lib, hududlar kesimida Toshkent shahri (24,9 foiz), Navoiy viloyati (14,9 foiz) va Qoraqalpog‘iston (13,1 foiz) yetakchilik qilmoqda. Aholining eng katta qismini umumiy o‘rta ma’lumotlilar (42,8 foiz) va o‘rta maxsus hamda professional ma’lumotlilar (35,8 foiz) tashkil etadi.

Ta’lim darajasida jins va yashash joyiga qarab sezilarli tafovutlar mavjud. Xususan, erkaklarning 13,9 foizi oliy ma’lumotga ega bo‘lsa, ayollar orasida bu ko‘rsatkich 10,2 foizni tashkil etadi. Yashash joyi bo‘yicha esa shaharlarda oliy ma’lumotlilar ulushi (14,2 foiz) qishloq joylaridagidan (9,3 foiz) 1,5 baravar yuqori. Shuningdek, ayni paytda ta’lim tashkilotlarida 7 yosh va undan katta 9,6 milliondan ortiq kishi tahsil olmoqda, shundan qariyb 1,73 million nafari oliy ta’lim muassasalarida tahsil olayotganlardir.

Yo‘llardagi radarlar va kameralarning to‘g‘ri ishlashi tekshirilmoqda

Ijtimoiy tarmoqlarda radarlar tezlikni noto‘g‘ri qayd etayotgani haqida tarqalgan xabarlar ortidan, Yo‘l harakati xavfsizligi xizmati (YHXX) mamlakat yo‘llariga o‘rnatilgan barcha foto-video qayd etish qurilmalari va radarlarni maxsus avtomobillar yordamida tekshiruvdan o‘tkazmoqda. Qurilmalarning belgilangan texnik talablarga muvofiqligi hamda barqaror ishlashini ta’minlash maqsadida jarayonga O‘zbekiston Milliy metrologiya instituti mutaxassislari jalb qilinib, ular tomonidan muntazam metrologik sinovlar amalga oshirilmoqda.

Mazkur nazorat tadbirlari fuqarolar manfaatlarini himoya qilish hamda yo‘l harakati qoidalari ijrosida adolat va xolislikni ta’minlash maqsadida tashkil etilgan. Tekshiruvlar davomida aniqlangan kamchiliklar hamda qonunbuzilish holatlari yuzasidan tegishli mas’ul shaxslarga nisbatan qonunchilikda belgilangan tartibda qat’iy choralar ko‘rilishi ta’kidlandi (eslatib o‘tamiz, bundan avval yo‘llarda mobil radarlar borligini bildiruvchi maxsus belgilarni o‘rnatish talabi bekor qilingan edi).

Oktyabrda aholi eng ko‘p go‘sht, sut va yoqilg‘i qimmatlaganini sezdi

Markaziy bank e’lon qilgan so‘rovnoma natijalariga ko‘ra, 2026 yil oktabr oyida O‘zbekiston aholisi tomonidan sezilgan inflatsiya darajasi 10,2 foizga yetib, 6,5 foizlik rasmiy ko‘rsatkichdan sezilarli darajada yuqori bo‘ldi. Hududlar kesimida narxlarning o‘sishini eng yuqori baholaganlar Toshkent shahrida (12,1 foiz), eng past ko‘rsatkich esa Qoraqalpog‘iston Respublikasida (8,5 foiz) qayd etilgan. Shuningdek, daromadi 7 million so‘mdan yuqori bo‘lgan fuqarolar hamda axborot texnologiyalari va OAV sohasida ishlovchilar (11,1 foiz) inflatsiyani boshqalarga qaraganda ko‘proq his qilgan.

So‘rovda ishtirok etgan respondentlarning aksariyati, ya’ni 52 foizi go‘sht va sut mahsulotlari, 47 foizi esa benzin va yoqilg‘i narxlari qimmatlaganini ta’kidlagan. Bundan tashqari, aholining 38 foizi elektr energiyasi va tabiiy gaz, 24 foizi yo‘lkira va tashish, 22 foizi esa umumiy ovqatlanish xizmatlari narxi oshganini bildirgan. Eslatib o‘tamiz, sentabr oyida sezilgan inflatsiya 9,2 foizni tashkil etgan va o‘shanda ham go‘sht hamda sut mahsulotlari narxining oshishi yetakchi o‘rinda qayd etilgan edi.

Zoyir Mirzayev amfiteatrni ta’mirlashga 7 mlrd so‘m sarflamoqchi

Toshkent viloyati hokimi Zoyir Mirzayev Nurafshon shahridagi «Yangi O‘zbekiston bog‘i» hududida joylashgan amfiteatr binosini mukammal ta’mirlash maqsadida 7 milliard so‘m mablag‘ ajratdi. Hokimning 16-noyabrdagi farmoyishiga asosan, ushbu mablag‘lar viloyat budjetining ikkinchi chorak daromadlar rejasining orttirib bajarilgan qismi hisobidan qoplanadi va «Toshkent viloyati hokimligi huzuridagi Toshkent viloyatida biznes markazlarini qurish direksiyasi» hisobiga o‘tkazib beriladi.

Shu bilan birga, Andijon viloyati hokimi Shuhrat Abdurahmonov 25–27-noyabr kunlari Toshkentda bo‘lib o‘tadigan xalqaro turizm yarmarkasi va investitsiya forumi kabi tadbirlarda viloyat delegatsiyasining yuqori saviyada ishtirok etishini ta’minlash maqsadida 2026 yilgi zaxira jamg‘armasidan 602 million so‘mdan ortiq mablag‘ ajratdi. Eslatib o‘tamiz, avvalroq Xiva va Toshkent shahar hokimliklari ham turli ijtimoiy masalalar, mahalla binosi qurilishi, gul xarid qilish hamda yo‘llarni ta’mirlash maqsadlari uchun milliardlab so‘m budjet mablag‘larini yo‘naltirgan edi.

«Apex Bank»ning boshqaruv raisiga yangi o‘rinbosar tayinlandi

Akmal Mansurov «Apex Bank» boshqaruvi raisining o‘rinbosari lavozimiga tayinlandi. Mazkur qaror bank kuzatuv kengashining 12-noyabrdagi yig‘ilishida qabul qilingan bo‘lib, ushbu tayinlovdan bir hafta avval bankning boshqaruv raisi vazifasini bajaruvchi hamda uning o‘rinbosari lavozimni tark etgan edi. Bunga qadar Mansurov 2024 yilning fevralidan to joriy yilning yanvariga qadar «Asia Alliance Bank» boshqaruvi raisi o‘rinbosari bo‘lib faoliyat yuritgan.

1982 yilda tug‘ilgan Akmal Mansurov Toshkent irrigatsiya institutining bakalavr va Toshkent davlat iqtisodiyot universitetining magistratura bosqichlarini tamomlagan. U o‘zining bank sohasidagi faoliyatini 2003 yilda «O‘zsanoatqurilishbank»da boshlab, 2018 yilga qadar turli mas’ul vazifalarda, jumladan filial boshlig‘i sifatida ishlagan. Shuningdek, 2018–2020 yillarda xususiy kompaniyalarda moliya direktori, so‘ngra «Asia Alliance Bank»da departament boshlig‘i lavozimlarida mehnat qilgan.

Teglar

Mavzuga oid