Банк ва финтех: кимнинг мобил иловаси яхшироқ?

SNS Ratings агентлиги 2026 йил феврал ойи учун Ўзбекистон банклари ва тўлов ташкилотларининг мобил иловалари рейтингини эълон қилди.

Рейтинг Google Play, App Store ва фойдаланувчилар фаоллиги асосида 100 баллик тизимда баҳоланган.

Таҳлил натижаларига кўра, банк иловаларининг ўртача балли (80,08) тўлов ташкилотлари иловаларининг (78,33) ўртача балидан юқори бўлди. 

Рейтингда 29 та банк ва 20 та тўлов ташкилотларининг мобил иловалари қатнашган. Уларнинг баҳоси 11 та шкалага бўлинган. 

Февраль ойида ҳам банк иловалари орасида етакчиликни яна “TBC Bank” сақлаб қолди. Унинг мобил иловаси 97,59 балл билан рейтингда биринчи ўринни эгаллади. 

Умуман олганда, банк иловаларининг ўтган ойдаги рейтинг натижалари ўзгармаган. Кучли бешталикни январ ойидаги каби: “Anor bank” (94,68 балл), “Ipak Yo‘li bank” (94,08 балл), “Uzum bank” (91,73 балл) ва “Aloqabank” (89,35 балл) эгаллади.

Кейинги ўринларда “Tenge Bank”, “Asakabank”, “SQB”, “Milliy bank” ва “Open Bank” жойлашиб, ТОП-10 рўйхатини тўлдирди. Уларнинг рейтинг баллари 85–88 оралиғида шаклланган.

Тўлов ташкилотлари орасида энг юқори баҳоланган илова “INSPIRED” бўлди. Компания иловаси 97,81 балл билан рейтингда етакчилик қилди.

Иккинчи ўринни “CLICK” (95,47 балл), учинчи ўринни эса “ALIF TECH” (91,58 балл) банд этди. Шунингдек, “Beelab” ва “UzPaynet” ҳам юқори натижалар билан биринчи бешликни якунлади.

Таҳлилларга қарайдиган бўлсак, барча иловаларининг Android версиялари iOS версияларига нисбатан юқорироқ баҳоланганини кўриш мумкин. Фойдаланувчилар фаоллиги бўйича кўрсаткичлар эса деярли барча иловаларда юқори даражада сақланиб қолган.

Энг паст балл олган иловалар

Банк иловалари орасида энг паст баҳоланганлар банклар: “Garant Bank” (60,28 балл), “Universal Bank” (64,11 балл), “Davr Bank” (69,15 балл), “KDB Bank Uzbekistan” (70,73 балл) ҳамда “Apex Bank” (70,20 балл) бўлди. Ушбу банк иловалари фойдаланувчилар баҳолари ва фаоллик кўрсаткичлари бўйича рейтингнинг энг охирги қисмидан жой олди. 

Тўлов ташкилотлари иловалари орасида “Smart Marketplace” (61,22 балл), “Choyxona”(61,79 балл), “Center for Digital Technology and Innovation” (64,75 балл), “Limon Pay” (65,41 балл) ва “Mayasoft” (66,62 балл) рейтингда энг паст баҳо олган иловалар бўлди.

Айрим иловаларнинг паст баҳоланиши бир нечта сабаблар билан боғлиқ бўлиши мумкин. Масалан, иловаларда функциялар камлиги, интерфейснинг қулай эмаслиги, техник муаммолар ёки фойдаланувчилар фаоллигининг пастлиги бунга таъсир қилиши мумкин.

Шунингдек, рейтинг натижалари агентликнинг таҳлилий фикрига асосланган бўлиб, уни расмий факт сифатида қабул қилиш тавсия қилинмайди.

Тэглар:

SEO title:

Meta description: SNS Ratings Ўзбекистон банклари ва тўлов ташкилотлари мобил иловаларининг февраль ойи рейтинги натижаларини эълон қилди.