Rahmon Markaziy Osiyoda yirik neftni qayta ishlash zavodlarini qurishni taklif qildi

Tojikiston prezidenti Imomali Rahmon Markaziy Osiyo mamlakatlarida yoqilg‘i ishlab chiqarish uchun yirik neftni qayta ishlash zavodlarini qurishni taklif qildi. Ushbu taklif 31-iyul kuni Qirg‘izistonning Cho‘lponota shahrida bo‘lib o‘tgan Markaziy Osiyo va Ozarbayjon davlat rahbarlarining norasmiy maslahat uchrashuvida bildirildi.

Davlat rahbarining so‘zlariga ko‘ra, bunday korxonalarni tashkil etish mintaqaviy va global energiya bozorlaridagi vaziyatni hisobga olgan holda, ayniqsa dolzarbdir.

Imomali Rahmon mintaqa mamlakatlari uchun boshqa umumiy ustuvorliklar qatorida transport yo‘laklari va logistika, energetika, sanoat, raqamlashtirish va oziq-ovqat xavfsizligini rivojlantirishni tilga oldi.

U, shuningdek, Markaziy Osiyoga xalqaro miqyosda qiziqish ortib borayotganini ta’kidladi. Uning aytishicha, bu savdo-iqtisodiy aloqalarni kengaytirish, investitsiyalarni jalb qilish va zamonaviy texnologiyalardan foydalanish uchun yangi imkoniyatlar ochadi.

Prezident geosiyosiy keskinlikning kuchayib borayotgani, xalqaro munosabatlar arxitekturasining o‘zgarib borayotgani va yangi xavfsizlik tahdidlarining paydo bo‘layotganini ta’kidladi. U mintaqadagi davlatlarni ushbu muammolarga birgalikda va samarali javob berishga chaqirdi.

Markaziy Osiyoda neftni qayta ishlash zavodlariga ehtiyoj yuqori, chunki mintaqada yoqilg‘i-moylash materiallariga talab yildan-yilga oshmoqda. Hozirda Farg‘ona neftni qayta ishlash zavodi va Buxoro neftni qayta ishlash zavodi kabi mavjud korxonalar modernizatsiya qilinib, ekologik talablar va yuqori sifatli yoqilg‘i ishlab chiqarishga o‘tmoqda.

Eslatib o‘tamiz, avvalroq Rossiya benzin eksportiga qo‘yilgan taqiqni 2027-yil boshigacha uzaytirdi. Mutaxassislarning aytishicha, taqiqqa asosiy sabab — Ukraina dronlarining Rossiyadagi neftni qayta ishlash zavodlariga muntazam hujumlari. Shu sababli neftni qayta ishlash hajmi kamaygan va ichki bozorda yoqilg‘i yetishmovchiligi yuzaga kelgan.