«Anthropic» 69,3 mlrd dollarlik IPO bo‘yicha dastlabki ma’lumotlarni qaytarib oldi

«Anthropic»ning rekord darajadagi IPO’si, jumladan, qariyb 70 mlrd dollar jalb qilish rejalari haqidagi ma’lumotlar 9-noyabr kuni banklarga qisqa muddatga yuborildi. Biroq kechga borib ushbu ma’lumotlar qaytarib olindi. Bu haqda «Reuters» agentligi ko‘rgan elektron xatlarda ma’lum qilingan.

«Anthropic» vakili qimmatli qog‘ozlarni chiqarish bo‘yicha hujjat nusxasini yuborgan. Unda kompaniya har bir aksiyani 70–80 dollar oralig‘idagi narxda sotish orqali qariyb 867 mln dona aksiya taklif qilishni rejalashtirgani ko‘rsatilgan. Shundan so‘ng vakil elektron xat orqali narxga oid ma’lumotlar noto‘g‘ri ekanini bildirgan. «Anthropic» ikkinchi xatida hujjatni keyinroq yangilashini ma’lum qilgan.

Kompaniya izoh berishdan bosh tortdi. Banklarga yuborilgan ikkinchi xatda aynan qaysi ma’lumot noto‘g‘ri ekani ko‘rsatilmagan.

69,3 mlrd dollarlik IPO va aksiyalar taklifi

Qaytarib olingan dastlabki xatda «Anthropic» ikkilamchi taklifni ham hisobga olgan holda 866,7 mln dona A toifali aksiyani sotishni rejalashtirgani qayd etilgan. Shundan 843,3 mln donaga yaqin aksiyani kompaniyaning o‘zi, qolgan 23,3 mln donasini esa mavjud aksiyadorlar sotishi ko‘zda tutilgan. Taklif etilgan narx oralig‘ining yuqori chegarasi bo‘yicha IPO orqali 69,3 mlrd dollar jalb qilinishi mumkin edi.

Yirik texnologiya kompaniyalari ham investitsiya kiritmoqchi

Bundan tashqari, dastlabki hujjatda «Anthropic» IPO bilan bir qatorda dunyoning eng yirik texnologiya kompaniyalaridan 26 mlrd dollar investitsiya jalb qilish bo‘yicha kelishuvga erishgani ko‘rsatilgan. Bu holat sun’iy intellekt sohasidagi jadal rivojlanish ortida moliyaviy aloqalar tobora kuchayib borayotganini ko‘rsatadi.

Dastlabki hujjatga ko‘ra, «Alphabet» tarkibidagi «Google», «Nvidia», «Advanced Micro Devices» (AMD), «Broadcom», «Micron Technology», «Microsoft» va TSMC kompaniyalari IPO narxida «Anthropic»ning N toifali oddiy aksiyalarini xususiy joylashtirishda ishtirok etishga kelishib olgan. Ushbu bitim IPO yakunlanganidan so‘ng darhol amalga oshirilishi kerak edi.

«Anthropic» 10-noyabr kuni investorlar uchun taqdimot safarini rasman boshlashi kutilmoqda. Aksiyalar narxi esa keyingi haftada belgilanishi rejalashtirilgan.

«Anthropic» IPO’si sun’iy intellekt infratuzilmasi va ma’lumotlar markazlari sohasidagi boshqa kompaniyalar rejalashtirilgan birjaga chiqishlarini kechiktirayotgan yoki bekor qilayotgan bir paytda amalga oshmoqda.

1,5 trln dollarlik baho

Foiz stavkalarining oshishi «CoreWeave» kabi sun’iy intellekt operatorlari aksiyalari va obligatsiyalarining keskin arzonlashishiga sabab bo‘ldi. Shuningdek, sun’iy intellekt sohasiga yo‘naltirilayotgan katta xarajatlarning uzoq muddatli barqarorligi borasida ham savollar paydo bo‘lmoqda.

Avvalroq investorlar «Anthropic» kompaniyasining bozor qiymatini 2 trln dollargacha baholash imkoniyatini muhokama qilgan edi. Biroq keyinchalik kutilmalar pasaydi va 1,5 trln dollarlik baho yuqori chegara sifatida ko‘rilmoqda.

2021-yilda «OpenAI»ning sobiq rahbarlari, jumladan, Amodey va uning singlisi, hozirda «Anthropic» prezidenti lavozimida ishlayotgan Daniela Amodey tomonidan tashkil etilgan kompaniya generativ sun’iy intellekt ishlab chiquvchilari orasida yetakchilardan biriga aylandi. Bunga uning «Claude» modellari oilasi ham katta hissa qo‘shdi.

Kompaniyaning tez sur’atlarda rivojlanishi «Google» va «Amazon» ko‘magiga tayanadi. Ushbu kompaniyalar bir vaqtning o‘zida «Anthropic»ning investorlari, hisoblash quvvati yetkazib beruvchilari va muhim tarqatish hamkorlari hisoblanadi. Shu bilan birga, ular sun’iy intellekt bozorida «Anthropic» bilan raqobatlashadi.

«Anthropic»ning «Amazon» va «Google» kabi hamkorlar bilan hisoblash quvvatiga oid majburiyatlari qariyb 900 mlrd dollarga yetgan. Bu kompaniyaning jadal o‘sishi kelajakda katta hajmdagi hisoblash quvvatiga bog‘liqligini ko‘rsatadi. Ushbu quvvatning bir qismi esa kompaniya nazoratidan tashqaridagi moliyalashtirish manbalariga tayanadi.

Kompaniya shu oyning boshida yangilangan hujjatida ma’lum qilishicha, 30-sentabrda yakunlangan uch oy davomida uning daromadi qariyb 17 mlrd dollarni tashkil etgan. Shunga qaramay, «Anthropic»ning choraklik o‘sish sur’ati keskin pasaygan.