«Жаноб Ҳеч Ким Путинга қарши» филми «Оскар» мукофотини қўлга киритди

«Жаноб Ҳеч Ким Путинга қарши» ҳужжатли филми Америка киноакадемиясининг 98-тақдирлаш маросимида «Энг яхши тўлиқ метражли ҳужжатли филм» номинациясида «Оскар» мукофотини қўлга киритди. Филмни Павел Таланкин ва Девид Боренштейн суратга олган.

Асар 2022–2024 йиллар оралиғида Россиянинг Челябинск областидаги мактаблардан бирида тасвирга олинган лавҳаларга асосланган. Филм илк бор «Санденс» фестивалида намойиш этилган ва ўша ернинг ўзида танқидчилар эътирофига сазовор бўлган.

Филм мазмуни

Филм марказида Челябинск вилоятининг Карабаш шаҳридаги мактаб ташкилотчиси ва тасвирчиси Павел Таланкин турибди. У икки йил давомида иш жойида яширинча тасвирга олган архив лавҳалари асосида филм яратилган.

Таланкин мактаб маъмурияти учун турли тадбирлар ҳақида видеоҳисоботлар тайёрлаш билан шуғулланган. Шу жараёнда у расмий тадбирлар билан бирга Россия мактабларида 2022-йилдан кейин шакллана бошлаган муҳитни ҳам тасвирга олган.

Кадрларда янги мафкуравий дастурлар жорий этилиши, шунингдек уруш қатнашчиларининг мактабларга ташрифлари акс этган.

Мукофот маросими

Лойиҳада америкалик режиссёр Девид Боренштейн ҳам иштирок этган. У филмни масофадан туриб монтаж қилишга ёрдам берган ва материалларнинг чет эл серверларида хавфсиз сақланишини таъминлаган.

Ҳозирда муҳожирликда яшаётган Павел Таланкин «Долби» театри саҳнасига чиқиб, мукофотни қабул қилиш пайтида залдагиларга рус тилида мурожаат қилди.

«Мен ўша фаровонлик манзарасини яратиши керак бўлган «камера кўтарган одам» эдим. Бироқ ҳақиқат хавфсизликдан муҳимроқ бўлиб чиқди. Бу филм фарзандларимиз келажаги ҳақида бўлиб, биз уни бой беришга ҳаққимиз йўқ. Илтимос, ҳозироқ барча урушларни тўхтатинг», деди у.

Бу Россия ҳақидаги ҳужжатли филмларнинг охирги тўрт йил ичидаги учинчи ғалабаси бўлиб, бундай суриштирувлар жаҳон киносида энг харидоргир жанрлардан бирига айланганини тасдиқлайди.

https://www.trtrussian.com/article/379c3e94b81f