Ёнғиндан сўнг «Park in Mall» фаолияти тўхтатилди

Фавқулодда вазиятлар вазирлиги Тошкент шаҳрида жойлашган «Park in Mall» оилавий савдо ва кўнгилочар маркази фаолиятини вақтинча тўхтатди.

15 март куни туш пайтида савдо марказининг учинчи қаватида ёнғин содир бўлган. Вазирлик маълумотига кўра, ёнғин таъмирлаш ишлари олиб борилаётган хоналардан бирида бошланган. Дастлабки тахминларга кўра, ҳодиса электр симларидан нотўғри фойдаланиш оқибатида юзага келган.

Ёнғин ҳақида сигнал соат 13:18 да келиб тушган. Ўт ўчирувчилар воқеа жойига бир дақиқа ичида етиб борган ва ёнғинни 10 дақиқадан кам вақтда бартараф этган. Ҳодиса оқибатида ҳеч ким жабрланмаган, аммо 25 квадрат метр майдонга зарар етган.

Маълум қилинишича, ёнғин содир бўлган пайтда бинода таъмирлаш ишлари олиб борилаётган бўлган. Унинг юқори қаватида эса овқатланиш шохобчалари ва болалар майдончаси жойлашган. Ижтимоий тармоқларда тарқалган видеоларда бинода тутун тарқалгани ва одамлар болалари билан бинодан чиқиб кетаётгани акс этган.

Шунингдек, видеокадрларда ёнғинга қарши сигнализация ёки бошқа хавфсизлик тизимларининг ишлаётгани кўринмагани ҳам муҳокамаларга сабаб бўлди. Текширув давомида бинода бир қатор қоидабузарликлар ва хавфсизлик талабларига тўлиқ риоя этилмаган ҳолатлар аниқланган.

Вазирликнинг таъкидлашича, айрим хоналарни ижарага олган тадбиркорлар электр тармоқларидан нотўғри фойдаланган. Мутахассислар ёнғин айнан шу ҳолат билан боғлиқ бўлиши мумкинлигини билдирмоқда.

Аввалроқ Тошкент шаҳар Фавқулодда вазиятлар бошқармаси мазкур савдо маркази биноси ҳали расман фойдаланишга топширилмаганини маълум қилган эди. Шунга қарамай, у ерда бир неча ой давомида дўконлар, кафе ва бошқа хизмат кўрсатиш объектлари ишлаб келган.

Эслатиб ўтиш жоиз, жорий йил 31 январ куни Яшнобод туманидаги Авиатор савдо мажмуасида ҳам ёнғин содир бўлганди. Шу ҳодисадан кейин республика бўйлаб савдо ва кўнгилочар объектларда ёнғин хавфсизлиги қоидаларига риоя этилишини текшириш ишлари бошланган.