«Adolat» partiyasi qoidabuzar haydovchilar uchun jazolarni keskin oshirishni taklif etdi

O‘zbekistonda yo‘l harakati xavfsizligini ta’minlash masalasi yana kun tartibiga chiqdi. «Adolat» sotsial-demokratik partiyasi yo‘llarda sodir bo‘layotgan fojiaviy holatlar fondida haydovchilar javobgarligini kuchaytirish bo‘yicha bir qator tashabbuslarni ilgari surdi.

Partiya bayonotida ta’kidlanishicha, so‘nggi yillarda mamlakatda yo‘l-transport hodisalari soni yuqori darajada qolmoqda. Faqat 2024 yilning o‘zida 9364 ta YTH qayd etilgan, ularda qariyb 9 ming kishi jarohat olgan va 2203 nafar fuqaro halok bo‘lgan. Jabrlanuvchilarning katta qismi bolalar ekanligi jamiyatni jiddiy tashvishga solmoqda.

Shu munosabat bilan partiya quyidagi choralarni taklif etdi: birinchidan, yo‘llarda o‘lim holatini keskin kamaytirish uchun xalqaro Vision Zero dasturini joriy etish; ikkinchidan, «Maktab atrofi — xavfsiz hudud» dasturini qabul qilish orqali bolalar xavfsizligini kuchaytirish; uchinchidan, yo‘l qoidalarini takror buzgan haydovchilar uchun sug‘urta to‘lovlarini oshirish orqali iqtisodiy javobgarlikni kuchaytirish; to‘rtinchidan, voyaga yetmaganlar o‘limi bilan bog‘liq YTHlarda jazoni ikki barobar og‘irlashtirish va ta’lim muassasalari atrofida tezlikni oshirganlarga nisbatan qat’iy javobgarlik belgilash.

Partiyaning eng muhim takliflaridan biri — tezlikni surunkali ravishda oshirgan haydovchilarni transport vositasini boshqarish huquqidan amaldagi uch yil emas, balki o‘n yilgacha mahrum qilish; shuningdek, mast holda odam o‘limiga sabab bo‘lgan haydovchilarni umrbod haydovchilik guvohnomasidan mahrum etishdir.

«Yo‘llarda aholi, ayniqsa, bolalar xavfsiz harakatlana olmas ekan, bu butun jamiyat uchun signal bo‘lishi kerak», — deyiladi partiya bayonotida.

«Adolat» partiyasi fraksiyasi ushbu tashabbuslarni qonunchilik tashabbusi sifatida Oliy Majlisga kiritishini ma’lum qildi.

Ma’lumot uchun, 2024 yilda 9364 ta yo‘l-transport hodisalari sodir bo‘lgan va avariyalarda 2203 nafar odam vafot etgan.