«AQSH keskinlikni istamaydi»: Zelenskiy va Tramp raketa masalasini oshkor etmaslikka kelishdi

Ukraina prezidenti Volodimir Zelenskiy va AQSH rahbari Donald Tramp o‘rtasidagi muzokaralar yakunlangach, Zelenskiy Oq uyni tark etdi, Tramp esa vertolyotda Vashingtondan uchib ketdi. Ukraina OAVlari xabariga ko‘ra, Zelenskiy shundan so‘ng Yevropa yetakchilari bilan telefon orqali guruhli muloqot o‘tkazgan, ammo suhbatda qatnashganlar ro‘yxati oshkor etilmagan. Keyin u matbuot anjumanida uchrashuv natijalari haqida gapirdi.

«Biz uzoq masofali qurol-yarog‘ yetkazib berish masalasini muhokama qildik va buni jamoat oldida muhokama qilmaslikka qaror qildik. Hozircha AQSH keskinlikni oshirishni xohlamayapti», — dedi Zelenskiy.

Uning ta’kidlashicha, Rossiya Ukrainaga Tomahawk raketalari yetkazilishi va ular milliy qurol tizimlari bilan birgalikda qo‘llanishidan qo‘rqmoqda, shu sababli bu jarayonni to‘xtatishga urinayapti. Savollarga javob berganida Zelenskiy «Tomahawk» masalasidagi imkoniyatni «realistik» deb baholadi. Shuningdek, u Tramp bilan Ukrainaning havo mudofaa tizimi bo‘yicha ham muzokaralar o‘tkazganini bildirdi. Donald Tramp esa jurnalistlarga izoh bermadi, ammo Truth Social’da qisqa bayonot yozdi:

«Ukraina prezidenti Volodimir Zelenskiy bilan uchrashuv juda qiziqarli va iliq kechdi. Men unga, xuddi prezident Putinga aytgandek, qon to‘kishni to‘xtatish va kelishuv tuzish fursati kelganini aytdim!» — deyiladi xabarda.

Tramp boshqa tafsilotlarni ochiqlamadi. AQSH rasmiylari esa hozircha Ukrainaga uzoq masofali raketa yetkazib berish borasida rasmiy qaror qabul qilinmaganini qayd etmoqda.