AQSH o‘z fuqarolarini Eronni zudlik bilan tark etishga chaqirdi

Amerika Qo‘shma Shtatlarining Erondagi elchixonasi o‘z saytida ogohlantirish e’lon qilib, o‘z fuqarolarini Islom Respublikasini zudlik bilan tark etishga chaqirdi. Idora ma’lumotlariga ko‘ra, hozirda Eronda xavfsizlik choralari kuchaytirilgan, yo‘llar to‘silgan, jamoat transporti ishi buzilgan va internet bloklangan.

«Eron hukumati mobil, statsionar va milliy internet tarmog‘iga kirishni cheklashda davom etmoqda. Aviakompaniyalar Eronga va Erondan amalga oshiriladigan reyslarni cheklamoqda yoki bekor qilmoqda. AQSH fuqarolari internet ishidagi uzilishlar davom etishini kutishlari, aloqaning muqobil vositalarini rejalashtirishlari va agar xavfsiz bo‘lsa, Erondan quruqlik orqali Armaniston yoki Turkiyaga chiqib ketish imkoniyatini ko‘rib chiqishlari kerak», - deyiladi xabarda.

Mamlakatni zudlik bilan tark eting

Shundan so‘ng elchixona Eronni zudlik bilan tark etishga yoki «AQSH hukumati yordamiga bog‘liq bo‘lmagan Erondan chiqib ketish rejasini» ishlab chiqishga chaqirdi.

«Reyslar jadvalidagi bekor qilishlar va uzilishlar oldindan ogohlantirishsiz yuz berishi mumkin. Dolzarb ma’lumot olish uchun bevosita o‘z aviakompaniyalaringizga murojaat qiling», - deb ogohlantirdi elchixona.

Qolishga majbur bo‘lganlar uchun muhim tavsiyalar

Shu bilan birga, hozirda mamlakatni tark eta olmaydigan fuqarolarni o‘z uylari ichida yoki boshqa binoda xavfsiz joy topishga chaqirishdi.

«Oziq-ovqat, suv, dori-darmon va boshqa zarur narsalarni zaxira qiling. So‘nggi yangiliklardan boxabar bo‘lish uchun mahalliy OAVni kuzatib boring. Rejalaringizni o‘zgartirishga tayyor turing. Telefoningizni quvvatlangan holda tuting va oilangiz hamda do‘stlaringizga holatingiz haqida xabar berish uchun ular bilan aloqada bo‘ling», - deb maslahat berdi idora.

Harbiy tahdidlar

Avvalroq Bi-bi-si rus xizmati Fors ko‘rfazi hududiga, Eron qirg‘oqlariga Amerika aviatashuvchi guruhi kelgani haqida xabar bergan edi. Bundan oldin eronlik deputat, agar Eronga nisbatan harbiy kuch ishlatilsa, Amerika harbiy xizmatchilarini oilalari bilan xayrlashishga chaqirgan edi.

Yanvar oyi oxirida esa AQSH prezidenti Eron hukumatini yadroviy kelishuv tuzishga chaqirgandi. Tramp navbatdagi hujum 2025 yil yozidagi «Yarim tungi bolg‘a» operatsiyasidan ham kuchliroq bo‘lishi bilan tahdid qilgan.