Chechenistonda nogironlikni soxtalashtirish bo‘yicha Rossiyada eng yuqori ko‘rsatkich aniqlandi
Rossiya Sog‘liqni saqlash vazirligi ma’lumotlariga ko‘ra Checheniston soxta nogironlik holatlari bo‘yicha mamlakatda yetakchiga aylangan. Bunday holatlar nafaqa va imtiyozlar olish maqsadida amalga oshirilayotgani aytilmoqda.
Bu boradagi ma’lumotlar Davlat tibbiy-ijtimoiy ekspertiza markazi hisobotiga asoslanadi.
Ta’kidlanishicha, Chechenistonda tibbiy-ijtimoiy komissiyalar tomonidan berilgan nogironlik maqomiga ega shaxslar soni real tibbiy ko‘rsatkichlar bilan mos kelmaydi. Vazirlikning ma’lum qilishicha, ko‘p hollarda bu kabi soxta nogironlik maqomlari davlat nafaqalari va turli imtiyozlardan foydalanish maqsadida qo‘lga kiritilgan.
Masalan, Grozniy shahrida ayrim shaxslar shifokorlar bilan til biriktirib, asossiz ravishda nogiron deb topilgani qayd etilgan. Shu bilan birga nogironlik maqomi olishga qaratilgan korrupsiyaviy sxemalar ham fosh qilingan.
Mutaxassislar bunday holatlar mamlakat tibbiy-ijtimoiy tizimiga putur yetkazayotganini ta’kidlamoqda. Shu sababli vazirlik soxta nogironlik holatlarini aniqlash va bartaraf etish bo‘yicha maxsus tekshiruvlar o‘tkazishni boshlagan.
Boshqa hududlar bilan taqqoslaganda Chechenistonda bu holatlar nisbatan ko‘proq kuzatilmoqda. Mutasaddilar fikricha, nafaqalarga muhtojlik va nazoratsizlik bu jarayonga turtki bo‘layotgan asosiy omillardan hisoblanadi.
