Endi pensiyani onlayn tarzda naqd pul shakliga o‘tkazish mumkin

O‘zbekistonda pensiya to‘lovlarini boshqarishda yana bir muhim qadam qo‘yildi. Pensiya jamg‘armasi tomonidan my.gov.uz portali orqali pensiyani naqd pul shakliga o‘tkazish bo‘yicha onlayn xizmat ishga tushirildi. Yangi imkoniyat fuqarolarni ortiqcha hujjatbozlik va idoralarga borish zaruratidan xalos qilib, pensiya masalasida masofaviy xizmatlar qamrovini kengaytiradi.

Endi pensiya oluvchilar tuman yoki shahar pensiya bo‘limlariga shaxsan murojaat qilmasdan, barcha jarayonni elektron tarzda amalga oshirishi mumkin. Bu, ayniqsa, yoshi katta fuqarolar va harakatlanishi cheklangan shaxslar uchun qulaylik yaratadi. Xizmat pensiya tizimida raqamlashtirish jarayonlari izchil davom etayotganini ko‘rsatadi.

Qanday qilib onlayn shaklga o‘tkazish mumkin?

Pensiyani naqd shaklga o‘tkazish uchun ariza beruvchi Yagona interaktiv davlat xizmatlari portalida ro‘yxatdan o‘tishi yoki mavjud akkaunti orqali avtorizatsiyadan o‘tishi kerak. Shundan so‘ng «Pensiya to‘lovini naqd pul shakliga o‘tkazish» xizmatini tanlab, elektron so‘rov yuboriladi. Muhimi, xizmat bepul bo‘lib, qo‘shimcha hujjatlar taqdim etish talab etilmaydi.

O‘zbekistonda qancha fuqaro pensiya oladi?

Raqamlar pensiya to‘lovlarida bank kartalari ustunligini ko‘rsatmoqda. Moliya vazirligi huzuridagi Pensiya jamg‘armasi ma’lumotlariga ko‘ra, mamlakatda 4,2 million nafar fuqaro pensiya oluvchi sifatida ro‘yxatga olingan. Ulardan 3,8 million nafari pensiya mablag‘larini bank plastik kartalari orqali qabul qiladi, bu esa umumiy pensiya oluvchilarning 89 foiziga to‘g‘ri keladi.