Klinik tadqiqotlarsiz davlat ro‘yxatidan o‘tkaziladigan tibbiy jihozlar ro‘yxati tasdiqlandi
Tibbiy jihozlarni klinik tadqiqotdan o‘tkazilyotganda xavfsizlik darajasidan kelib chiqib, kamida 20 nafar subyekt jalb etilishi shart.
Tibbiy jihozlarning klinik tadqiqotlarini o‘tkazish tartibini belgilaydigan yangi nizom davlat ro‘yxatidan o‘tkazildi. Hujjat 2026 yil 7-yanvar kuni Adliya vazirligida 3746-son bilan rasman ro‘yxatga olindi. Ushbu nizom tibbiy jihozlarni baholash, xavfsizlik va samaradorlik talablarini yagona huquqiy asosda tartibga solishni ko‘zda tutadi.
Nizomga muvofiq, ayrim toifadagi tibbiy jihozlar klinik tadqiqotlar o‘tkazilmasdan davlat ro‘yxatidan o‘tkaziladi. Bular:
Xavfsizlik klassifikatsiyasi bo‘yicha I sinfga mansub tibbiy jihozlar;
Jahon sog‘liqni saqlash tashkiloti tomonidan qayta malakalangan va mazkur tashkilot bilan hamkorlikda ro‘yxatdan o‘tkaziladigan in vitro tashxis tibbiy jihozlari;
O‘zbekiston hududida ilgari klinik tadqiqotlari o‘tkazilgan tibbiy jihozlar qo‘shimcha klinik sinovlarsiz davlat ro‘yxatidan o‘tkazilishi mumkin.
Bu amaliyot mahalliy va xalqaro ishlab chiqaruvchilar uchun ma’muriy jarayonlarni soddalashtirishga xizmat qiladi.
Klinik tadqiqotlarni o‘tkazish zarurligi to‘g‘risidagi qaror maxsus ekspert xulosasi asosida qabul qilinadi. Bu qaror O‘zbekiston Respublikasi Sog‘liqni saqlash vazirligi huzurida tashkil etilgan Ekspertlar kengashi tomonidan ko‘rib chiqiladi va tasdiqlanadi.
Nizomda klinik tadqiqotlarni o‘tkazish tartibi ham aniq belgilangan. Unga ko‘ra, tibbiy jihozning xavfsizlik darajasidan kelib chiqib, klinik tadqiqotlarga kamida 20 nafar subyekt jalb etilishi shart. Bu talab inson salomatligi uchun ehtimoliy xavflarni kamaytirish va tibbiy jihozlarning ishonchliligini ta’minlashga qaratilgan.
