«Miyalar sotilmaydi»: Makron Fransiyada bolalar uchun ijtimoiy tarmoqlarni taqiqlashni topshirdi
U bolalar amerikalik platformalar va xitoylik algoritmlar tomonidan manipulyatsiya qilinmasligini aytdi.
Prezident Fransiya Emmanuel Makron yangi o‘quv yili boshlanguniga qadar, ya’ni sentabr oyidan boshlab, 15 yoshgacha bo‘lgan bolalarga ijtimoiy tarmoqlardan foydalanishni taqiqlashni topshirdi. Bu haqda CNN xabar berdi.
Emmanuel Makronning aytishicha, 15 yoshgacha bo‘lgan bolalar uchun ijtimoiy tarmoqlardan foydalanish taqiqi kelasi o‘quv yili boshlanishidan oldin, ya’ni 2026 yil sentabr oyida kuchga kiradi.
«Bolalarimiz va o‘smirlarimizning miyasi sotilmaydi. Ularning his-tuyg‘ulari ham sotilmaydi va na amerikalik platformalar, na xitoylik algoritmlar tomonidan manipulyatsiya qilinishga yo‘l qo‘yilmaydi. Biz 15 yoshgacha bo‘lgan shaxslar uchun ijtimoiy tarmoqlarni taqiqlaymiz va o‘rta maktablarimizda mobil telefonlarni ham taqiqlashni rejalashtiryapmiz. Meningcha, bu aniq qoida — o‘smirlar uchun ham, oilalar uchun ham, o‘qituvchilar uchun ham aniq qoidadir», - dedi Makron videomurojaatida.
Fransiyadagi mazkur taqiq tashabbuskori «Uyg‘onish» partiyasi deputati Lora Miller hisoblanadi. Miller intervyusida hukumatga aniq choralar ko‘rish zarurligini ta’kidladi.
«Siz istalgan tug‘ilgan sanani kiritib, platformalarga kirish imkoniyatiga ega bo‘lishingiz mumkin. Biz Yevropa Ittifoqining raqamli xizmatlar to‘g‘risidagi qonuniga (DSA) qat’iy rioya qilgan holda, ijtimoiy tarmoqlarga kirishda haqiqiy yoshni tekshirish tizimini joriy etmoqchimiz. Bu barcha narsani o‘zgartiradi, chunki foydalanuvchilar haqiqatan ham 15 yoshdan katta ekanini isbotlashiga to‘g‘ri keladi», - dedi u.
