O‘zbekiston — Turkiy davlatlar tashkilotini modernizatsiya qilishda asosiy ishtirokchi

O‘zbekistonning Turkiy davlatlar tashkiloti (TDT)ga qo‘shilishi 2019 yilda tashkilot rivojida hal qiluvchi burilish nuqtasi bo‘ldi. Prezident Shavkat Mirziyoyev tashabbusi bilan mamlakat a’zolikka kirganidan so‘ng, tashkilot faoliyatiga yangi siyosiy va iqtisodiy mazmun qo‘shildi. Bu qadam TDTni turkiy dunyo davlatlarining amaliy hamkorlik platformasiga aylantirdi. 2022 yilda Samarqandda O‘zbekiston raisligida o‘tgan sammit TDT tarixida muhim voqea sifatida qayd etildi. Unda «Samarqand deklaratsiyasi», 2022–2026 yillarga mo‘ljallangan TDT strategiyasi va «Turkiy dunyo nigohi–2040» konsepsiyasi qabul qilindi. Ushbu hujjatlar iqtisodiyot, transport, raqamli texnologiyalar, fan, ta’lim, madaniyat va «yashil energetika» sohalaridagi uzoq muddatli yo‘nalishlarni belgilab berdi. O‘zbekiston raisligi davrida Turkiy investitsiya jamg‘armasini yaratish bo‘yicha amaliy ishlar boshlandi. Bu tuzilma TDT doirasidagi qo‘shma loyihalarni moliyalashtirishning asosiy vositasi bo‘lishi kutilmoqda. Shu bilan birga, savdo va bojxona hamkorligini soddalashtirish, transport bog‘liqligini kuchaytirish bo‘yicha yangi tashabbuslar ilgari surildi. Humanitar yo‘nalishda ham faol ishlar amalga oshirildi. Buxoroda TDT mamlakatlari yosh yetakchilari forumi o‘tkazilib, shahar «Turkiy dunyoning yoshlar poytaxti» deb e’lon qilindi. Bu tashabbus O‘zbekistonning tashkilotdagi humanitar siyosatga qo‘shgan hissasini mustahkamladi. 2025 yilning 6–7 oktyabr kunlari Gabalada bo‘lib o‘tgan navbatdagi sammitda ham O‘zbekiston turkiy dunyo birdamligini amaliy hamkorlik, investitsiya, infratuzilma va bilim almashuv orqali mustahkamlash g‘oyasini ilgari surdi. Prezident Mirziyoyev ta’kidlaganidek, turkiy hamjihatlik ramzlarda emas, aniq natijalarda ifodalanishi lozim. Ko‘p qirrali sheriklikni kengaytirish va jadallashtirish maqsadida Turkiy davlatlar tashkilotini 2030 yilgacha rivojlantirish strategiyasi va uni amalga oshirish bo‘yicha alohida "yo‘l xaritasi"ni ishlab chiqish taklif qilindi. Ushbu hujjatlarda quyidagi aniq yo‘nalish va chora-tadbirlarni aks ettirish zarurligi qayd etildi. O‘zbekiston Prezidenti yaqin istiqbolda TDT doirasida savdo, biznes va o‘zaro investitsiyalar uchun eng qulay sharoitlar, huquqiy asos va infratuzilma yaratishni nazarda tutadigan Yangi iqtisodiy imkoniyatlar makonini shakllantirish muhimligini yana bir bor ta’kidladi. Amaliy hamkorlikni izchil rivojlantirish va aniq loyihalarni ishlab chiqish, xususan, Turkiy investitsiya jamg‘armasi doirasidagi rejalarni kelishish maqsadida Turkiy davlatlarning iqtisodiy sheriklik bo‘yicha doimiy kengashini ta’sis etish muhimligi qayd etildi. Doimiy asosda faoliyat yuritadigan ushbu tuzilmaga Tashkilot mamlakatlari Bosh vazirlarining o‘rinbosarlari rahbarlik qilishi mumkin. Kengashning Loyiha ofisini Toshkent shahrida joylashtirish taklif etildi. Kechaning o‘zida Mirziyoyev TDTdagi ishtirokini yakunlab, Toshkent shahriga qaytib keldi.