Qishki olimpiada-2026da Rossiya bayroqlari to‘liq taqiqlandi
Italiyada o‘tadigan qishki Olimpiadada Rossiyaga oid barcha ramzlar man etildi. Qaror neytral maqomda qatnashadigan sportchilarga ham taalluqli.
2026 yilgi qishki Olimpiya o‘yinlari obyektlariga Rossiya bayroqlarini olib kirish taqiqlandi. Bu haqda TASS agentligi xabar berdi. Taqiq zamonaviy va tarixiy bayroqlar, shuningdek, Rossiya bilan bog‘liq deb baholanishi mumkin bo‘lgan har qanday belgilarni o‘z ichiga oladi.
Qaror faqat tomoshabinlar uchun emas, balki musobaqalar o‘tkaziladigan barcha rasmiy maydonlar va infratuzilma obyektlariga nisbatan amal qiladi. Tashkilotchilar ta’kidlashicha, cheklov neytral maqomda ishtirok etishga ruxsat berilgan davlatlar sportchilari bilan bog‘liq barcha ramzlarga ham tatbiq etiladi.
Qishki Olimpiada 2026 yil 6–22-fevral kunlari Italiyaning Milan va Kortina-d’Ampetsso shaharlarida bo‘lib o‘tadi.
Neytral maqom siyosati
Rossiya sportchilari uchun cheklovlar 2022 yil mart oyida BMT tomonidan emas, balki Xalqaro olimpiya qo‘mitasi tavsiyasi bilan joriy etilgan. O‘sha paytda MOQ xalqaro federatsiyalarga Rossiya va Belarus sportchilarini musobaqalardan chetlatishni taklif qilgan edi.
2023 yil dekabrda esa MOQ Rossiya va Belarus vakillarini Parij-2024 Olimpiadasiga neytral maqomda qo‘yishni tavsiya qildi. Natijada Fransiyada o‘tgan o‘yinlarda 15 nafar rossiyalik atlet ishtirok etdi, ammo ularga davlat ramzlari, jumladan, bayroq va madhiyadan foydalanish qat’iyan man etildi.
Bu amaliyot Olimpiada harakatining so‘nggi yillardagi asosiy yo‘nalishlaridan biriga aylangan.
Yondoshuv saqlanadi
2025 yil 19-sentabr kuni Xalqaro olimpiya qo‘mitasi rahbari Kristi Koventri Rossiya sportchilariga nisbatan mavjud yondoshuv saqlab qolinishini ma’lum qilgan edi. Unga ko‘ra, sportchilar ishtirok etishi mumkin, ammo davlat ramzlari va rasmiy atributlarsiz.
Mutaxassislar bu qarorni Olimpiada harakatini siyosiy ziddiyatlardan himoya qilishga qaratilgan urinish sifatida baholamoqda. Shu bilan birga, cheklovlar Rossiya sport tizimining xalqaro musobaqalardagi ishtiroki uzoq muddatli tarzda qayta formatlanayotganini ham ko‘rsatadi.
Avvalroq Xalqaro futbol federatsiyasi (FIFA) Rossiyaga qo‘yilgan cheklovlar bo‘yicha ovoz berishni rejalashtirmayotgani, masala hozircha muhokamadan tashqari qolayotgani haqida xabar bergan edik.
