Saida Mirziyoyeva «ACWA Power» kompaniyasi raisi bilan uchrashdi
Uchrashuvda energetika, sog‘liqni saqlash va raqamli texnologiyalar sohalaridagi qo‘shma loyihalar, ayniqsa Qoraqalpog‘istondagi rivojlanish imkoniyatlari atroflicha ko‘rib chiqildi.
O‘zbekiston Respublikasi Prezident Administratsiyasi rahbari Saida Mirziyoyeva «ACWA Power» kompaniyasi raisi va «Vision Invest» direktorlar kengashi a’zosi Muhammad Abunayan bilan uchrashuv o‘tkazib, ikki tomonlama hamkorlikka oid qator strategik masalalarni muhokama qildi. Uchrashuvda mamlakat iqtisodiyotini modernizatsiya qilishga xizmat qiladigan yirik investitsiyaviy loyihalarni amalga oshirish masalasi asosiy e’tiborda bo‘ldi.
Saida Mirziyoyevaning ta’kidlashicha, energetika tarmog‘idagi qo‘shma tashabbuslar mamlakatda barqaror energiya ta’minotini ta’minlashda muhim o‘rin tutadi. Shu bilan birga, zamonaviy sog‘liqni saqlash infratuzilmasini yaratish va raqamli texnologiyalarni iqtisodiyotning turli sohalariga joriy etish masalalari ham dolzarb yo‘nalishlar sifatida qayd etildi.
Uchrashuv davomida Qoraqalpog‘istonning so‘nggi yillarda namoyon qilayotgan rivojlanish sur’atlari alohida tilga olindi. Mazkur hududda amalga oshirilishi rejalashtirilgan istiqbolli loyihalar ikki tomonlama hamkorlikning yangi bosqichiga aylanishi mumkinligi ta’kidlandi.
Bu loyihalar hudud iqtisodiyotini qo‘llab-quvvatlash, yangi ish o‘rinlari yaratish va aholi turmush sifatini oshirishga xizmat qilishi kutilmoqda.
Mirziyoyeva o‘zining telegram-kanalida uchrashuv natijalari haqida ma’lumot berib, muloqotda ikki davlat kompaniyalari o‘rtasidagi uzoq muddatli va samarali hamkorlikni yanada kuchaytirish muhim ekanini qayd etdi.
Muhammad Abunayan esa O‘zbekistonda amalga oshirilayotgan islohotlar va yaratilgan investorlar uchun qulay sharoitlarni yuqori baholagan holda qo‘shma loyihalarni yanada kengaytirishga tayyorligini bildirdi.
Uchrashuv mamlakatning strategik soha va hududlarida amalga oshiriladigan qo‘shma tashabbuslar uchun yangi imkoniyatlar ochishi bilan ahamiyatli bo‘ldi.
