Saida Mirziyoyeva yangi Bosh vazir o‘rinbosarini jamoatchilikka tanishtirdi

Dilnoza Kattaxonova Bosh vazirning xotin-qizlar masalalari bo‘yicha o‘rinbosari etib tayinlandi. Yangi rahbarni jamoatchilik va soha vakillariga Prezident Administratsiyasi rahbari Saida Mirziyoyeva tanishtirdi va tizimdagi muhim vazifalarni belgilab berdi.

Xotin-qizlar siyosatida 5 ta ustuvor vazifa belgilandi

Yig‘ilish davomida xotin-qizlar bandligini ta’minlash, xorijdagi va og‘ir hayotiy vaziyatga tushib qolgan ayollarni qo‘llab-quvvatlash hamda zo‘ravonlikning oldini olish masalalari tizimli yondashuvni talab etishi ta’kidlandi.

Yangi rahbar oldiga quyidagi beshta asosiy vazifa qo‘yildi:

– Iqtisodiy faol bo‘lmagan ayollar bilan ishlash: Har bir xotin-qiz bilan manzilli ishlashning mutlaqo yangi tizimini yaratish.
– Xorijdagi ayollarni qo‘llab-quvvatlash: Chet elda mehnat qilayotgan xotin-qizlar va ularning oilalari bilan tizimli ishlash, farzandlari davlat e’tiborida bo‘lishini ta’minlash.
– Og‘ir vaziyatdagi ayollarni jamiyatga qaytarish: Qiyin hayotiy vaziyatga tushgan (jazo muddatini o‘tayotgan, oilasidan uzoqda mehnat qilayotgan) ayollarni ta’lim, kasb-hunar, psixologik va huquqiy jihatdan qo‘llab-quvvatlash.
– Zo‘ravonlikning oldini olish: Xotin-qizlarga nisbatan zo‘ravonlik holatlarining oldini oladigan va xavfni barvaqt aniqlaydigan elektron tizimni joriy etish.
– Oilalarni mustahkamlash: Ajrimlarni kamaytirish, yoshlarni nikohga tayyorlash va bepul oilaviy psixologik xizmatlar ko‘lamini kengaytirish.