Urushlar, tariflar va inflatsiya: milliarderlarni 2026-yilda nima ko‘proq qo‘rqityapti?
Dunyoning eng boy odamlari iqlim o‘zgarishi yoki texnologik uzilishlarga qaraganda, bojxona to‘siqlaridan ko‘proq xavotirda.
Savdo urushlari, geosiyosiy beqarorlik va davlat siyosatining oldindan aytib bo‘lmasligi 2026 yilda jahon iqtisodiyoti uchun asosiy xatarlar ro‘yxatining boshidan joy oldi. Dunyoning eng boy odamlari iqlim o‘zgarishi yoki texnologik uzilishlarga qaraganda, bojxona to‘siqlaridan ko‘proq xavotirda. Bu haqda «UBS Billionaire Survey» so‘rovi natijalariga tayanib, «Visual Capitalist» xabar bermoqda.
Jahon kapitali qo‘rquvlarining TOP-3 tasi
So‘rovga ko‘ra, o‘ta boy investorlar kayfiyatini uchta asosiy omil belgilab bermoqda:
Tariflar va savdo cheklovlari (66%) – yilning eng katta tahdidi. Respondentlarning ko‘pchiligi proteksionizm yo‘lga qo‘yilgan ta’minot zanjirlarini izdan chiqaradi, deb qo‘rqmoqda.
Yirik geosiyosiy mojarolar (63%) – urushlar, mintaqaviy beqarorlik va yirik davlatlar o‘rtasidagi qarama-qarshilik qo‘rquvi iqtisodiy muammolarga juda yaqin turibdi.
Siyosiy noaniqlik (59%) – milliarderlar o‘yin qoidalarining aniq emasligi va yetakchi davlatlar hukumatlari qarorlarining oldindan aytib bo‘lmasligidan xavotirda.
Shuningdek, so‘rovda qatnashganlarning salmoqli qismi (44%) hanuz yuqori inflatsiyadan tashvishlanmoqda. Bu esa dunyoda narxlar barqarorligi hali ham mo‘rt ekanini ko‘rsatadi.
Qo‘rquv geografiyasi: Osiyo bojlardan, Amerika esa urushlardan qo‘rqadi
Tadqiqot xatarlarni qabul qilishda qiziqarli mintaqaviy farqlarni ochib berdi:
Osiyo–Tinch okeani mintaqasi: bu yerda milliarderlarning 75 foizi tariflarni asosiy muammo deb atagan. Bu mantiqiy, chunki ushbu mamlakatlar iqtisodiyoti jahon savdosiga chuqur integratsiyalashgan va eksportga bog‘liq.
Shimoliy va Janubiy Amerika: bu mintaqada respondentlarning 70 foizi inflatsiya va geosiyosiy mojarolarning kuchayishidan eng ko‘p qo‘rqmoqda.
Eng kam tashvish solayotgan omillar
Qiziq jihati shundaki, texnologik izdan chiqishlar (15%) va iqlim o‘zgarishi (14%) kabi global chaqiriqlar ustuvorliklar ro‘yxatining eng oxirida qolgan. Bu yirik kapital ularni hozirgi «shok» siyosiy va iqtisodiy tahdidlardan farqli ravishda, uzoq muddatli yoki boshqarish mumkin bo‘lgan muammolar sifatida ko‘rayotganini anglatadi.
