Yer aholisining 84 foizi hali sun’iy intellektdan foydalanmayapti — tadqiqot

Hozirda dunyo sun’iy intellekt innovatsiyalarini joriy etishning boshlang‘ich bosqichida turibdi, bu esa biznes va investorlar uchun ulkan istiqbollarni ochib beradi. Bu haqda «Aiso» kompaniyasi hamta’sischisi Benjamin Tannenbaum «LinkedIn»da yozdi.

Ijtimoiy pufakka qarshi real statistika

Sun’iy intellektdan global foydalanish vizualizatsiyasi texnologiya haqidagi tasavvur bilan real holat o‘rtasida keskin farq borligini ko‘rsatadi. Sayyoradagi 8,1 milliard aholining 84 foizi (yoki 6,8 milliardi) hech qachon SIdan foydalanmagan.

Aholining faqat 16 foizi (taxminan 1,3 milliard kishi) bepul chat-botlar bilan muloqot qilgan. Shu bilan birga, tijorat segmenti yanada kichik: oyiga 20 dollarlik pulli obunalarga ega bo‘lganlar jami 0,3 foizni (15–25 million kishi) tashkil etadi.

Kod yozish uchun mo‘ljallangan ixtisoslashgan instrumentlar, masalan, «Cursor» yoki «Claude Code»dan esa atigi 0,04 foiz foydalanadi. Bu 2–5 million nafar mutaxassis degani.

Tahlilchining qayd etishicha, texnologiyaning «ommaviyligi» haqidagi tasavvur aldamchidir. SI haqida yangilik o‘qiydigan odamlar, ehtimol, aynan shu faol foydalanuvchilarning juda kichik qatlamiga kiradi. Shu bois texnologiya qanchalik keng tarqalgani haqidagi fikrlar juda tor ijtimoiy «pufak» ichida shakllanadi.

2005 yilgi internet bilan parallellar

Mutaxassis sun’iy intellekt bozorining hozirgi holatini jahon tarmog‘i shakllanayotgan davr bilan qiyoslaydi. Foydalanuvchilar ulushi 16 foizni tashkil etishi internetning taxminan 2005 yillardagi tarqalish darajasiga mos keladi.

Bugun odatiy bo‘lib qolgan barcha raqamli industriyalar – ijtimoiy tarmoqlar, elektron tijorat, striming xizmatlari, bulutli texnologiyalar va obuna asosidagi dasturiy ta’minot – aynan o‘sha davrdan keyin barpo etilganini eslash joiz. Bu esa sun’iy intellektni rivojlantirish va keng joriy etishning asosiy to‘lqini hali oldinda ekanini anglatadi.

Texnologiya gigantlarining o‘sish to‘lqiniga tayyorgarlik sifatidagi investitsiyalari

«Microsoft», «Alphabet» (Google), «Meta» va «Amazon» kabi yirik texnologik korporatsiyalar sun’iy intellekt bozori hozirda ilk bosqichda ekanini yaxshi tushunadi. Shu bois ular tegishli infratuzilmani rivojlantirishga yuzlab milliard dollar sarmoya kiritmoqda.

Asosiy investitsiyalar yangi kuchli data-markazlar qurilishi va neyrosetlarni o‘rgatish hamda ishlatish uchun zarur maxsus mikrochiplar (masalan, «Nvidia» kompaniyasi mahsulotlari) xarid qilishga yo‘naltirilmoqda. Texnologik gigantlar hozirdan katta kapital xarajatlarni ko‘tarishga tayyor, chunki 84 foiz aholi sun’iy intellektni kundalik hayot va ish faoliyatiga keng integratsiya qila boshlagan paytda ularda tayyor quvvatlar bo‘lishini istaydi.