AQSH Venesuelaga qarshi uch harbiy ssenariyni ko‘rib chiqmoqda — The New York Times
Vashington Venesuelaga nisbatan uch xil harbiy chorani muhokama qilmoqda — havo hujumlaridan tortib maxsus bo‘linmalar ishtirokidagi operatsiyalargacha, deb yozmoqda NYT.
AQSH ma’muriyati Venesuelaga nisbatan harbiy choralarni qo‘llash ehtimolini ko‘rib chiqmoqda. Bu haqda The New York Times gazetasi o‘z manbalariga tayanib xabar berdi. Manbalarning ma’lum qilishicha, muhokama qilinayotgan variantlardan biri — diktator Nikolas Maduro qo‘shinlariga tayangan harbiy qudratni susaytirish maqsadida strategik ob’ektlarga havo hujumlari uyushtirishdir.
Ikkinchi ssenariyda esa maxsus xizmatlar ishtirokida Maduroni qo‘lga olish yoki yo‘q qilish operatsiyasi ko‘zda tutilgan. Bu usulning maqsadi — mamlakatdagi siyosiy boshqaruvni keskin o‘zgartirish va qudratni muxolifat qo‘liga o‘tkazishdir.
Gazeta yozishicha, uchinchi variant eng murakkab hisoblanadi — u AQSHning terrorizmga qarshi kuchlarini Venesuelaga jo‘natib, aeroportlar hamda ayrim neft konlari va infratuzilma ustidan nazorat o‘rnatishni o‘z ichiga oladi. Bu, ehtimol, iqtisodiy manfaatlar va mintaqadagi strategik ta’sirni mustahkamlashni ko‘zlaydi.
1 noyabr kuni Washington Post xabar berganidek, AQSH Venesuela qirg‘oqlariga harbiy kemalar, suvosti kemalari va minglab harbiylarni jo‘natgan. Karib havzasidagi harbiy harakatlar kengayishi Vashingtonning mintaqa bo‘yicha yangi bosqichdagi faoliyatga tayyorlanayotganidan darak bermoqda.
Ekspertlarning fikricha, agar mazkur ssenariylardan biri amalga oshsa, Lotin Amerikasida yangi geosiyosiy inqiroz boshlanishi mumkin.
