AQSHda noqonuniy bo‘lib turgan 44 nafar o‘zbekistonlik deportatsiya qilindi
Amerikada noqonuniy bo‘lib turgan o‘zbekistonliklarning navbatdagi guruhi charter reys orqali Vatanga qaytarildi.
Bugun, 21-yanvar kuni Amerika Qo‘shma Shtatlarida noqonuniy bo‘lib turgan 44 nafar o‘zbekistonlik Vatanga qaytarildi. Bu haqda Tashqi ishlar vazirligi matbuot kotibi Ahror Burhonov xabar berdi.
Qayd etilishicha, AQSH hududida noqonuniy bo‘lib turgan shaxslarni deportatsiya qilish maqsadida ushbu davlatning vakolatli idoralari tomonidan yana bir charter reysi amalga oshirilgan. Ushbu reysda 44 nafar O‘zbekiston fuqarolari O‘zbekistonga qaytarilgan.
Ikki tomonlama hamkorlikning ahamiyati
Burhonovga ko‘ra, charter reysi AQSHning tegishli hukumat idoralari bilan hamkorlikda tashkillashtirilgan bo‘lib, uning amalga oshirilishi orqali O‘zbekiston fuqarolarining yurtiga xavfsiz va o‘z vaqtida qaytarilishi ta’minlangan.
«Mazkur tadbir O‘zbekiston va AQSH o‘rtasidagi hamkorlikning yana bir muhim namunasidir. Yurtimiz fuqarolarining o‘zga davlatlarda xavfsizligini ta’minlash, ularning qonuniy huquqlarini himoya qilish va ularni Vataniga qaytarish borasidagi hamkorlik davom etmoqda», - deyiladi xabarda.
Migratsiya siyosatidagi qat’iy choralar
Ma’lumot uchun, 30-aprel kuni qonuniy asoslarsiz AQSHda bo‘lgan yuzlab fuqarolar maxsus charter reysi orqali Nyu-Yorkdan Toshkentga olib kelingan edi. Ular orasida Qozog‘iston va Qirg‘iziston fuqarolari ham bo‘lib, keyinchalik o‘z davlatlariga jo‘nab ketishgan.
Eslatib o‘tamiz, AQSH rasmiylari 2025 yil 28-may kuni noqonuniy migratsiyaga qarshi kurashish va mamlakatga qonuniy kirish-chiqishni tartibga solish bo‘yicha yangi choralar joriy etilganini e’lon qilgan.
