Эроннинг янги раҳбари махфий тарзда Москвага олиб кетилгани айтилмоқда
Яқин Шарқдаги уруш бошлангандан бери жамоатчиликка кўриниш бермаган Эрон Олий раҳбари Мўжтабо Хоманаий даволаниш учун яширин рейс билан Россия пойтахтига эвакуация қилинди, деб ёзмоқда Кувайт нашрлари.
Кувайтнинг «Al Jarida» нашри ўз манбаларига таяниб хабар беришича, Мўжтабо Хоманаий ҳарбий амалиётларнинг илк кунидаёқ жароҳат олган ва доимий тиббий назоратга муҳтож бўлиб қолган.
Россия Президенти Владимир Путин 10 март куни Эрон Президенти Масъуд Пизишкиён билан телефон орқали сўзлашганда шахсан даволаниш таклифини берган. Шундан сўнг, Эрон раҳбари Россия ҳарбий самолётида Москвага олиб кетилган ва Путин қароргоҳларидан бири ҳудудидаги махсус клиникада муваффақиятли операция қилинган.
Мўжтабо Хоманаийнинг Москвага эвакуация қилинишига нафақат уруш шароитидаги тиббий қийинчиликлар, балки Исроилнинг уни йўқ қилиш ҳақидаги таҳдидлари ҳам сабаб бўлган. Эрон махсус хизматлари маҳаллий шифокорлар орқали раҳбарнинг манзили ҳақидаги маълумотлар сизиб чиқишидан хавфсирамоқда.
Аввалроқ Эрон Ташқи ишлар вазирлиги раҳбарнинг жароҳатини тасдиқлаган, бироқ унинг аҳволи барқарор эканини билдирган эди. «The New York Times» нашри эса унинг оёқларидан жароҳатлангани ҳақида ёзган.
Мурожаатнинг ҳақиқийлиги шубҳали
«Al Jarida» нашрининг яна бир манбаси Мўжтабо Хоманаий номидан эълон қилинган илк мурожаатнинг ҳақиқийлигига шубҳа билдирмоқда. Тахминларга кўра, ушбу матн Миллий хавфсизлик олий кенгаши котиби Али Лорижоний томонидан ёзилган бўлиши мумкин, чунки мурожаат мазмуни унинг аввалги чиқишларига жуда ўхшаш. Ушбу баёнотда Эрон АҚШ билан урушни давом эттириши ва дунё нефт етказиб беришнинг 20 фоизини таъминлайдиган Ҳўрмуз бўғози қамалини сақлаб қолиниши айтилган эди.
Айни пайтда Ғарб ОАВларида Эрон раҳбарининг аҳволи ҳақида турли хабарлар тарқалмоқда. Британиянинг «The Sun» таблоиди Мўжтабо Хоманаийнинг «оёқларидан айрилгани» ва «кома ҳолатида» эканини даъво қилган бўлса, АҚШ Мудофаа вазири Пит Ҳегсет унинг «майиб бўлгани ва яшириниб юргани»ни билдирган.
Трампнинг кескин позицияси
АҚШ Президенти Доналд Трамп Мўжтабо Хоманаийни АҚШ учун «мақбул бўлмаган шахс» деб атаб, ундан таслим бўлишни талаб қилган эди. Трампнинг таъкидлашича, Вашингтон ўлдирилган оятуллоҳнинг ворисини тан олмайди. Америка етакчиси Эроннинг янги раҳбарини тайинлашда шахсан иштирок этиши кераклигини, акс ҳолда янги ҳукумат «узоққа бормаслигини» қатъий таъкидлаган.
