Hult biznes maktabi va «El-yurt umidi» fondi bilan hamkorlik muhokama qilindi

Londonda joylashgan Hult International Business School vakillari O‘zbekiston elchixonasida «El-yurt umidi» jamoat fondi bilan hamkorlik istiqbollarini muhokama qilish maqsadida rasmiy uchrashuv o‘tkazdi. Bu haqda «Dunyo» axborot agentligi xabar berdi. Hult biznes maktabi 1964 yilda tashkil etilgan bo‘lib, AQSH, Buyuk Britaniya va BAAdagi kampuslariga ega. Maktab xalqaro biznes, moliya, biznes tahlillari, marketing yo‘nalishlarida bakalavr va magistratura (BBA, MBA, Executive MBA) dasturlarini taklif etadi. U ta’lim sifatini xalqaro darajada ta’minlovchi yetakchi muassasalardan biri hisoblanadi. Uchrashuv chog‘ida Hult vakillari O‘zbekistonda oliy ta’lim sohasida amalga oshirilayotgan islohotlarni yuqori baholadi. Xususan, «El-yurt umidi» jamoat fondining iqtidorli yoshlarni xorijda ta’lim olishiga ko‘maklashishga qaratilgan faoliyati e’tirof etildi. Hult rahbariyati mazkur fond bilan hamkorlikni yo‘lga qo‘yish va o‘zbekistonlik talabalar uchun yangi imkoniyatlar yaratishda qiziqish bildirdi. Shuningdek, Hult biznes maktabi dunyodagi eng obro‘li biznes-ta’lim muassasalari qatorida ekani qayd etildi. Uning ta’lim dasturlari AACSB, AMBA va EQUIS akkreditatsiyalariga ega bo‘lib, Financial Times hamda QS xalqaro reytinglarida yuqori o‘rinlarni egallab kelmoqda. Bunday uchrashuvlar O‘zbekiston yoshlari uchun dunyo miqyosidagi ta’limga keng yo‘l ochishga xizmat qilishi va ikki tomonlama hamkorlikni yanada mustahkamlashi kutilmoqda.