Коммунал қарзларни ундириш тартиби енгиллаштирилади

Ўзбекистонда коммунал хизматлар ва уй-жой бадаллари бўйича қарздорликларни ундириш тизими соддалаштирилди. Бу ҳақда Президент Шавкат Мирзиёев томонидан 20 апрел куни имзоланган янги қонунда белгиланди.

Ҳужжат «Суд ҳужжатлари ва бошқа органлар ҳужжатларини ижро этиш тўғрисида»ги қонунга ўзгартиш ва қўшимчалар киритиб, соддалаштирилган ижро тартиби қўлланиладиган ҳолатларни кенгайтирди. У расман эълон қилинган пайтдан бошлаб кучга кирди.

Қандай қарзлар киритилди

Янги тартибга кўра, энди коммунал хизматлар бўйича қарздорликлар ҳам соддалаштирилган тартибда ундирилади. Бу аввал фақат маъмурий жарималар ва солиқ қарзлари учун амал қилар эди.

Шунингдек, кўп квартирали уйлар мулкдорларининг мажбурий бадаллари — «квартплата», почта ва видеоконференцалоқа харажатлари ҳам мазкур рўйхатга киритилди. Бундан ташқари, 5 БҲМгача бўлган (тахминан 2,06 млн сўмгача) ҳар қандай қарздорликлар ҳам ушбу тартибда кўриб чиқилади.

Чекловлар ва тартиб

Қонунга мувофиқ, мазкур қарзлар бўйича фуқароларнинг банк ҳисобварақларидан пулни мажбурий тарзда ечиб олиш тақиқланди. Бу давлат ижрочиларининг ваколатларини чеклайди ва фуқаролар маблағларини ҳимоя қилади.

Шу билан бирга, қарздорликни ундириш механизми тўлиқ бекор қилинмаган. Ижро ҳужжатлари асосида қарздорнинг иш ҳақи, пенсияси, стипендияси ва бошқа даромадларидан ундириш имконияти сақланиб қолди.

Қонунга кўра, бундай ундирув миқдори белгиланган минимал иш ҳақи доирасидан ошмаслиги шарт. Бу эса фуқароларнинг ижтимоий ҳимоясини таъминлашга қаратилган.

Умуман, янги ўзгартишлар қарзларни ундириш жараёнини тезлаштириш билан бирга, банк ҳисобларининг дахлсизлигини таъминлашга хизмат қилади.