O‘zbekiston aeroportlari uch oyda 4 mln yo‘lovchiga xizmat ko‘rsatgan

Uzbekistan Airports ma’lumotlariga ko‘ra, 2026 yilning yanvar–mart oylarida mamlakat aeroportlari orqali 3 987 313 nafar yo‘lovchiga xizmat ko‘rsatildi. Bu o‘tgan yilning shu davriga nisbatan 19 foizlik o‘sishni anglatadi.

Yo‘lovchilarning asosiy qismi xalqaro qatnovlarga to‘g‘ri kelgan. Xususan, 3,32 milliondan ortiq yo‘lovchi xalqaro reyslardan foydalangan bo‘lsa, 663,5 ming kishi ichki yo‘nalishlarda parvoz qilgan. Bu esa tashqi aloqalar va sayohat faolligining ortib borayotganini ko‘rsatadi.

Hisobot davomida jami 30 859 ta aviareys amalga oshirildi. Bu ko‘rsatkich o‘tgan yilga nisbatan 10 foizga ko‘p. Shundan 22 885 tasi xalqaro, 7 974 tasi esa ichki reyslar hissasiga to‘g‘ri kelgan.

Asosiy yuklama an’anaviy tarzda poytaxtdagi Toshkent xalqaro aeroporti hissasiga to‘g‘ri keldi. Ushbu aeroport bir chorakda 2,56 million yo‘lovchi va qariyb 19 ming reysga xizmat ko‘rsatib, umumiy ko‘rsatkichning katta qismini ta’minladi.

Hududiy aeroportlar orasida ham faollik yuqori bo‘lib qolmoqda. Jumladan, Samarqand xalqaro aeroporti 376,4 ming, Urganch xalqaro aeroporti 222 ming va Namangan aeroporti 210,1 ming yo‘lovchiga xizmat ko‘rsatdi.

Yuk tashish sohasida ham ijobiy dinamika saqlandi. Birinchi chorakda 19 783 tonna yuk va pochta jo‘natmalari tashildi, bu o‘tgan yilga nisbatan 14 foizga ko‘pdir.