Samarqandda Mashinasozlik sanoat zonasi tashkil etiladi

O‘zbekiston Prezidentining 20-apreldagi qaroriga muvofiq, Samarqand viloyati Kattaqo‘rg‘on tumanida 100 gektar maydonda mashinasozlik sanoat zonasi tashkil etiladi. Mazkur tashabbus viloyatda sanoatni diversifikatsiya qilish va yuqori qo‘shilgan qiymatli mahsulotlar ishlab chiqarishni kengaytirishga qaratilgan.

2030 yilgacha rivojlantirish bosqichi

Qarorga ko‘ra, Samarqandda mashinasozlik klasterini rivojlantirish orqali 2030 yilgacha tarmoqning sanoatdagi ulushini 15 foizga, qo‘shilgan qiymat ulushini esa 40 foizga yetkazish maqsad qilingan. Bu esa viloyat iqtisodiyotida sanoat rolini sezilarli darajada oshirishga xizmat qiladi.

Yangi zonada yiliga 10 ming dona tijorat transport vositalari ishlab chiqarish quvvati yaratiladi. Ular qatoriga yuk avtomobillari, avtobuslar, mikroavtobuslar, pikaplar va maxsus transportlar, jumladan elektr transport vositalari kiradi. Shu bilan birga, ehtiyot qismlar va butlovchi buyumlar ishlab chiqarish yo‘lga qo‘yilib, mahalliy kontent hajmini yillik 100 million dollargacha yetkazish rejalashtirilgan.

Loyihaning asosiy maqsadi

Loyiha doirasida Markaziy Osiyo va MDH davlatlari bozorlarini o‘zlashtirish orqali eksportni kengaytirish, shuningdek, 2 mingdan ortiq yuqori daromadli ish o‘rinlari yaratish ko‘zda tutilgan. Sanoat zonasi ishtirokchilari sifatida faqat transport vositalari va ularning butlovchi qismlarini ishlab chiqaruvchi korxonalar ro‘yxatdan o‘tkaziladi.

Zonani boshqarish «Samarqand viloyati sanoat zonalarini boshqarish direksiyasi» davlat muassasasi tomonidan amalga oshiriladi. Dastlabki bosqichda xorijiy hamkorlar tomonidan umumiy qiymati 116 million dollar bo‘lgan 5 ta investitsiya loyihasini amalga oshirish bo‘yicha takliflar kelib tushgan.

Loyihaning bosqichma-bosqich amalga oshirilishi rejalashtirilgan: 2028 yildan mototransport va bolalar aravachalari, 2029 yildan tijorat transport vositalari ishlab chiqarish, 2031 yildan esa ishlab chiqarishni yanada kengaytirish ko‘zda tutilgan.

Avvalroq Buxoro viloyatida «Leapmotor» avtomobillarini ishlab chiqarish loyihasi ham yo‘lga qo‘yilishi xabar qilingan bo‘lib, bu mamlakatda avtomobilsozlik sanoatini rivojlantirish bo‘yicha kompleks yondashuv shakllanayotganini ko‘rsatadi.