Миллий инвестиция жамғармаси IPO'сида талаб таклифдан уч баравар ошиб кетди

Ўзбекистон Миллий инвестиция жамғармасининг (UzNIF) бирламчи оммавий таклифи катта қизиқиш уйғотди. Акциялар учун тушган буюртмалар ҳажми таклифдан уч баравардан кўпроқни ташкил этган. Бу ҳақда Spot ўз манбаларига таяниб, хабар бермоқда.

Манбаларнинг таъкидлашича, ортиқча талаб юзага келган тақдирда тақсимотда чакана инвесторларга устунлик берилади. Хусусан, 200 млн сўмгача ариза топширган жисмоний шахслар биринчи навбатда кўриб чиқилади.

Эслатиб ўтамиз, 29-апрел куни UzNIF умумий ҳажми 1,95 млрд долларгача бўлган IPO бошланганини эълон қилганди. Жойлаштириш жараёни 2026-йил 12-майгача давом этади. IPO Лондон ва Тошкентда икки томонлама, «dual listing» кўринишида ўтказилади.

Таклиф нархи бир GDR учун 25 доллар, бир акция учун эса 4,65 сўм этиб белгиланган. Ҳар бир GDR 64 700 та акцияга тенг. Барча қимматли қоғозлар ягона акциядор — Иқтисодиёт ва молия вазирлиги томонидан сотувга қўйилмоқда.

Жамғарманинг умумий акциялари сони 5 триллиондан ортиқ бўлиб, ушбу нарх компания капиталлашувини тахминан 1,95 миллиард долларга баҳоламоқда. IPO орқали компания акциядорлик капиталининг тахминан 30 фоизи инвесторларга таклиф этилади.

IPO икки қисмдан иборат: маҳаллий ва айрим хорижий инвесторлар учун акциялар, ҳамда халқаро институционал инвесторлар учун GDR'лар таклиф этилади.

«BlackRock», «Franklin Resources» ва «Redwheel» каби йирик фондлар, шунингдек, айрим ғазначилик компаниялари тахминан 300 млн долларлик GDR'ларга обуна бўлиш бўйича келишув тузган.

Жисмоний шахслар учун қўшимча рағбат сифатида 12 млрд сўмгача бўлган аризаларга 5 фоиз чегирма тақдим этилмоқда. Бу ҳолда акция нархи 4,41 сўмни ташкил қилади.

Чакана инвесторлар маҳаллий брокерлар (Alkes Research, Avesta Investment Group va Bluestone Financial Group Inc) ёки «Jett» платформаси орқали иштирок этиши мумкин. Савдолар Тошкент ва Лондон биржаларида тахминан 18-майдан бошланиши режалаштирилган.