Никоҳ шартномаларини тасдиқлаш тартиби белгиланди
Янги тартиб никоҳ шартномаларини расмийлаштиришда оилавий мулкий муносабатларда ҳуқуқий аниқликни таъминлашга қаратилган.
Ўзбекистонда никоҳ шартномаларини тасдиқлаш тартиби белгиланди. Бу бўйича тасдиқланган низом 2025 йил 5 январ куни Адлия вазирлиги томонидан давлат рўйхатидан ўтказилди.
Низомга мувофиқ, никоҳ шартномаси нотариус томонидан бир неча усулда расмийлаштирилиши мумкин. Хусусан, шартнома нотариал идора биносида, видеоконференцалоқа орқали ёки мурожаат қилувчиларнинг хоҳишига кўра сайёр тартибда тасдиқланади.
Шартномани расмийлаштириш учун фуқаро нотариал идорага шахсан мурожаат қилиши ёки электрон тарзда рўйхатдан ўтиши мумкин. Онлайн рўйхатдан ўтиш ЯИДХП ёки E-notarius.uz ахборот порталлари орқали амалга оширилади. Кейинчалик шартнома белгиланган тартибда нотариус иштирокида расмийлаштирилади.
Нотариус шартномани тасдиқлаш жараёнида тарафларнинг шахсини аниқлайди ҳамда қатор ҳуқуқий ҳолатларни текширади. Жумладан, тарафларнинг никоҳ ёшига етган-етмагани, ўзаро никоҳ муносабатлари мавжудлиги, томонлардан бирининг бошқа шахс билан никоҳи қайд этилмагани ва аввал никоҳ шартномаси тузилмагани ўрганилади.
Барча тўловлар амалга оширилиб, шартнома лойиҳаси тайёр бўлгандан сўнг, тарафлар уни имзолаш учун бир вақтнинг ўзида нотариус ҳузурига таклиф этилади. Шартноманинг барча нусхалари фамилия, исм ва отасининг исми тўлиқ кўрсатилган ҳолда нотариус иштирокида шахсан имзоланади.
Маълумот учун, никоҳ шартномаси никоҳланувчи шахслар ёки эр-хотиннинг никоҳ даврида ва ажрим ҳолатида уларнинг мулкий ҳуқуқ ҳамда мажбуриятларини белгилаб берувчи ҳуқуқий келишув ҳисобланади.
