Rossiya bozoriga urush boshlangandan beri ilk bor birorta ham yangi xorijiy brend kirmadi

Iste’mol talabining sovushi, savdo markazlarida odam oqimining kamayishi va Yaqin Sharqdagi urush tufayli logistikaning qimmatlashgani vaziyatni yanada chigallashtirmoqda. Xo‘sh, Rossiya bozorini kimlar tark etmoqda va rossiyaliklar nimalarni sotib olishdan voz kechishyapti?

 Yangi brendlar inqirozi va bozorni tark etayotganlar

«CORE.XP» konsalting kompaniyasi ma’lumotlariga ko‘ra, Rossiya bozorida xorijiy brendlar faolligi yildan yilga so‘nib bormoqda. Taqqoslash uchun, urush boshlangan 2022 yilning mos davrida mamlakatga 16 ta, 2025 yilda 9 ta yangi xalqaro brend kirib kelgan edi. O‘tgan yili umumiy hisobda 12 ta brend (jumladan, Ispaniyaning «Pdpaola», Belarusning «Mua» va Italiyaning «Kappa» markalari) do‘kon ochgan bo‘lsa, joriy yilda bu ko‘rsatkich nolga teng bo‘ldi.

Yangilar kelmayotgan bir paytda, eskilari ham bozorni tark etishda davom etmoqda. «Nikoliers» shirkati ma’lumotiga ko‘ra, 2026 yil boshidan buyon kamida 7 ta xalqaro brend, jumladan, Turkiyaning «Les Benjamins» va «Karaca Home», shuningdek, Qozog‘istonning «Gaissina» brendlari Rossiyadan butunlay ketdi. Bozorda qolgan kompaniyalar esa katta investitsiya kiritishdan qo‘rqib, faqat marketpleyslar yoki mahalliy distribyutorlar orqali ehtiyotkorona faoliyat yuritishni afzal ko‘rishmoqda.

Savdo markazlari huvillab qolmoqda

Xorijiy investorlarning Rossiya bozoridan sovishiga asosiy sabab — aholi xarid qobiliyatining pasayishidir. Rosstat ma’lumotlariga ko‘ra, 2026 yilning birinchi choragida iste’molchilarning ishonch indeksi minus 12 foizgacha tushib ketgan. Buning oqibatida savdo markazlariga tashrif buyuruvchilar soni ham keskin kamaydi:

· 2026 yilning yanvar-aprel oylarida mollar tashrifi o‘tgan yilga nisbatan 2 foizga kamaygan.

· Inqirozgacha bo‘lgan 2019 yil bilan solishtirganda esa xaridorlar oqimi chorak qismga (25–26 foizga) tushib ketgan.

Savdoning pasayishi nafaqat xorijliklarga, balki Rossiyaning mahalliy riteylerlariga ham zarba berdi va ular ham o‘z do‘konlarini ommaviy yopishga majbur bo‘lishmoqda.

Yaqin Sharqdagi urush va logistika zarbasi

Ekspertlarning fikricha, vaziyat yomonlashishiga AQSH va Isroilning Eronga qarshi harbiy harakatlari ham jiddiy ta’sir ko‘rsatgan. Uzoq vaqt davomida Dubay (BAA) Rossiya uchun eng yirik logistika xabi bo‘lib kelayotgan edi (o‘zaro tovar ayirboshlash 10 milliard dollarga yetgan). Ammo Yaqin Sharqdagi urush tufayli yuk tashish tariflari 30 foizdan 50 foizgacha qimmatlashib ketdi, bu esa yangi kolleksiyalar yetkazib berilishini kechiktirib, narxlarni yanada oshirdi.

Markaziy bank tadqiqotlari Rossiya aholisi hozirda qattiq tejamkorlik rejimiga o‘tganini ko‘rsatmoqda. Odamlar qimmatbaho texnika, kiyim-kechak, poyabzal va hatto oziq-ovqat mahsulotlari sotib olishni cheklashgan. Ijtimoiy so‘rovnomalarga ko‘ra, rossiyaliklarning 82 foizi mamlakatdagi iqtisodiy vaziyatdan xavotirda va yaqin bir yil ichida kommunal xizmatlar hamda mahsulotlar narxi ularning daromadidan ko‘ra tezroq o‘sishini kutishmoqda.