Май ойида ўзбекистонликлар энг кўп қайси корхона чекларини рўйхатдан ўтказди?

2026-йил май ойида харид чеклари «Soliq Mobile» иловаси орқали энг кўп рўйхатдан ўтказилган корхоналар рейтинги эълон қилинди. Унга кўра, «Olma» супермаркетлар тармоғи илк бор «Havas» дискаунтеридан ўзиб кетиб, иккинчи ўринга кўтарилди.

Рейтингда етакчиликни анъанавий тарзда «Корзинка» тармоғини бошқарувчи «Anglesey Food» МЧЖ ХК сақлаб қолди. Май ойида тармоқнинг 6 млн 869,9 мингта чеки «Soliq Mobile» иловасида рўйхатдан ўтказилган. Ушбу чеклар учун харидорларга 9,4 млрд сўмдан ортиқ кешбек ҳисобланган.

Иккинчи ўринга чиққан «Olma» тармоғини бошқарувчи «Xalq Retail» МЧЖнинг 2 млн 634,9 мингта чеки қайд этилган. Ушбу харидлар бўйича истеъмолчиларга 1,2 млрд сўм кешбек берилган.

Рейтингдаги ўзгаришлар

Солиқ қўмитаси «Soliq Mobile» иловасида энг кўп рўйхатдан ўтказилган чеклар рейтингини 2022-йил ноябрдан буён эълон қилиб келади. Шу вақтдан бери «Korzinka» биринчи ўринни сақлаб келмоқда.

Аввал иккинчи ўринда бўлиб келган Ҳавас май ойида учинчи поғонага тушди. «Havas Food» МЧЖ ҚКда 2 млн 438 мингта чек рўйхатдан ўтказилган ва улар учун 1,24 млрд сўм кешбек ҳисобланган.

Шу билан бирга, Ҳавас кешбек суммаси бўйича ҳали ҳам «Olma»дан олдинда. 2024-йил октябрида эса «Olma» чеклар сони бўйича «Makro» тармоғини ортда қолдирган эди.

Бозордаги рақобат кучаймоқда

«Olma» супермаркетлар тармоғи сўнгги йилларда жадал ўсиш кўрсатмоқда. 2022-йил ноябр ойида эълон қилинган илк рейтингларда корхона 17-ўринни эгаллаганди.

Май ойи рейтингида «Havas»дан кейинги ўринларни «Safia» брендини бошқарувчи Madina Qandolat» МЧЖ (748,3 мингта чек), «Makro» тармоғига тегишли «Darvoza Savdo» МЧЖ (506,2 мингта чек) ва «KFC» оператори «International Foodchain» МЧЖ (406,7 мингта чек) эгаллади.

Аввалроқ Солиқ қўмитаси UzQR орқали тўловларни қабул қилиш тартиби юзасидан тушунтириш берганди.

Эслатиб ўтамиз, 1-июлдан бошлаб Ўзбекистонда савдо ва хизмат кўрсатиш соҳасида ягона QR-кодли тўлов тизими — UzQR орқали тўловларни қабул қилиш тартиби кучга кирди.