Rossiyadagi benzin taqchilligi Markaziy Osiyoga ham ta’sir ko‘rsata boshladi — «Bloomberg»
Ayrim davlatlar yoqilg‘i ta’minotini ta’minlash uchun shoshilinch choralar ko‘rmoqda.
© Gazeta.ruRossiyada benzin ta’minoti bilan bog‘liq muammolar Markaziy Osiyo mamlakatlarida ham sezila boshladi. Rossiyadan import qilinadigan yoqilg‘iga yuqori darajada bog‘liq bo‘lgan davlatlar ta’minot xavfsizligini ta’minlash uchun qo‘shimcha choralar ko‘rmoqda. Bu haqda «Bloomberg» nashri xabar berdi.
Qirg‘iziston Energetika vazirligi bayonotiga ko‘ra, mamlakat energetika xavfsizligini ta’minlash va ichki bozorda neft mahsulotlari barqarorligini saqlash maqsadida joriy haftada mintaqaviy hamkorlari — Qozog‘iston, Ozarboyjon va Turkmanistondan yordam so‘ragan.
O‘zbekistonda esa benzin narxi keskin ko‘tarilgan. Birja ma’lumotlariga ko‘ra, iyun oyi boshidan buyon mamlakatda eng ommabop AI-92 benzinining ulgurji narxi 11,8 foizga oshib, tonnasi 13,9 million so‘mga yetgan. Shu bilan birga, birjada kunlik benzin taklifi ham qariyb ikki barobar qisqargan.
Taqchillikning sababi
Rossiyada benzin taqchilligi neftni qayta ishlash zavodlaridagi uzilishlar bilan izohlanmoqda. Bu uzilishlar Ukraina dronlari hujumlari oqibatida yuzaga kelgan.
Iyun oyi oxiriga kelib, Rossiya hududlarining qariyb 90 foizida yoqilg‘i taqsimoti cheklangani yoki ta’minot bilan bog‘liq muammolar kuzatilgan. Shu munosabat bilan Moskva 1-apreldan benzin eksportini taqiqladi. Biroq hukumatlararo bitimlar asosida amalga oshiriladigan yetkazib berishlar mazkur cheklovdan mustasno qoldirilgan.
Shunga qaramay, mintaqa mamlakatlari ehtimoliy uzilishlarga tayyorgarlik ko‘rishni boshlagan. Qirg‘iziston hozircha zaxiralar yetarli ekanini bildirgan bo‘lsa-da, qo‘shimcha import so‘rovini ehtiyot chorasi sifatida izohlagan.
Mintaqada xavotir kuchaymoqda
Markaziy Osiyoning eng yirik neft ishlab chiqaruvchisi hisoblangan Qozog‘iston ham yoqilg‘i oqimini nazorat qilishni kuchaytirdi. Mamlakat ayrim neft mahsulotlarini temir yo‘l orqali eksport qilishni taqiqladi va chegaralarda yangi cheklovlar joriy etdi.
20-iyun kuni bosh vazir Oljas Bektenov mutasaddilarga ichki bozorda yoqilg‘i tanqisligiga yo‘l qo‘ymaslik uchun barcha zarur choralarni ko‘rish, jumladan chegara nazoratini kuchaytirish bo‘yicha topshiriq bergan.
