OAV: Tramp suiqasd xavfi sabab Turkiyadan boshqa samolyotda yashirincha olib ketildi

AQSH prezidenti Donald Tramp Eron tomonidan suiqasd uyushtirilishi tahdidi sababli Turkiyada bo‘lib o‘tgan NATO sammitidan so‘ng mamlakatni yashirincha tark etgan. Maxsus xizmatlar tomonidan ishlab chiqilgan operatsiya natijasida Amerika yetakchisi boshqa samolyotda evakuatsiya qilingan. Bu haqda 10-avgust kuni «The Washington Post» nashri ma’lum qildi.

Chalg‘ituvchi manyovr va keytering mashinasidagi evakuatsiya

Prezident sammitga Qatar tomonidan AQSHga sovg‘a qilingan va maxsus yangilangan «Boeing 747-8» samolyotida kelgan edi. Biroq 7-8-iyul kunlari bo‘lib o‘tgan tadbirdan so‘ng, AQSH maxsus xizmatlari Eron tomonidan Tramp va uning samolyotiga qarshi tahdid borligini aniqlagan, deyiladi xabarda. Shu munosabat bilan prezidentni Turkiyadan xavfsiz olib chiqish bo‘yicha puxta o‘ylangan reja amalga oshirilgan.

Nashr ma’lumotlariga ko‘ra, Tramp avval jurnalistlar ko‘z o‘ngida eski «Air Force One» samolyotiga chiqqan. So‘ngra u samolyotning boshqa tomonidan aeroportning keytering xizmati mashinasi orqali yashirincha olib chiqilib, yaqinda turgan kichikroq «C-32A» harbiy samolyotiga o‘tkazilgan.

«Prezident Donald Trampga nisbatan suiqasd xavfi o‘tgan oyda favqulodda operatsiyani keltirib chiqardi, uning davomida u Turkiyadan yashirincha uchib ketdi», — deya maqoladan iqtibos keltiradi nashr.

Shu bilan birga, Oq uy xodimlarining bir qismi va jurnalistlar prezident shu bortda deb hisoblab, eski «Air Force One»da qolgan. Ularga parvoz vaqtida oyna pardalarini yopib turish buyurilgan va samolyot go‘yoki ichida Tramp bordek chalg‘ituvchi manyovr sifatida yo‘lga chiqqan.

Aslida esa Tramp «C-32A» samolyotida Buyuk Britaniyadagi «RAF Mildenhall» harbiy bazasiga olib borilgan. Bildirilishicha, prezident o‘sha yerdan yana o‘z samolyotiga o‘tib, Vashingtonga xavfsiz tarzda uchib ketgan.