Prezident Xorazmdagi 11 mln dollarlik korxona va yangi texnikumni ko‘zdan kechirdi

Prezident Shavkat Mirziyoyev Urganch tumanidagi «Tillo domor» korxonasining yangi ishlab chiqarish majmuasida sutni qayta ishlash va tayyor mahsulot ishlab chiqarish jarayoni bilan tanishdi.

Umumiy qiymati 11 million dollar bo‘lgan korxona yiliga qariyb 100 milliard so‘mlik mahsulot ishlab chiqarish quvvatiga ega. Majmua Bolgariyadan keltirilgan zamonaviy texnologik uskunalar bilan jihozlangan.

Korxonada pishloq, qaymoq, smetana, tvorog, qatiq va kefir kabi 70 dan ortiq turdagi mahsulot ishlab chiqarilmoqda. Xomashyo har kuni 100 dan ziyod fermer xo‘jaligi va aholidan xarid qilinib, chorvachilik bilan shug‘ullanayotganlar uchun barqaror sotuv bozori yaratilmoqda. Korxonada 120 ta ish o‘rni tashkil etilgan.

Ishlab chiqarish majmuasiga 100 kilovatt quvvatga ega quyosh panellari ham o‘rnatilgan. Kelgusida yana 100 ta ish o‘rni yaratish va mahsulot turlarini ko‘paytirish rejalashtirilgan.

Prezident yoshlar bilan muloqot qildi

Shavkat Mirziyoyev Urganch shahridagi Xorazm ilg‘or kasbiy mahorat texnikumi va uning hududida tashkil etilgan Kasblar shaharchasi faoliyati bilan ham tanishdi.

Texnikumni barpo etish uchun davlat budjetidan 72,4 milliard so‘m ajratilgan. 5,2 gektar maydonda 1 ming 100 o‘rinli ikkita o‘quv binosi, 300 o‘rinli yotoqxona, sport zali, oshxona va ikkita zamonaviy o‘quv ustaxonasi qurilgan.

Bu yerda Germaniya, Shveysariya, Buyuk Britaniya, Xitoy va Janubiy Koreyaning ilg‘or ta’lim dasturlari asosida o‘qitish yo‘lga qo‘yilgan. 2026-2027 o‘quv yili uchun 11 ta kasb yo‘nalishi bo‘yicha 200 nafar iqtidorli yosh imtihon asosida saralab olingan.

Ta’lim jarayoni ish beruvchilar bilan hamkorlikda tashkil etilib, dual ta’lim orqali nazariy bilimlarni ishlab chiqarish amaliyoti bilan bog‘lashga e’tibor qaratilmoqda. Bu bitiruvchilarni egallagan kasbi bo‘yicha ish bilan ta’minlash imkoniyatini oshiradi.

Ishlab chiqarish va ta’lim

Texnikum Xorazmdagi kasbiy ta’lim muassasalari uchun amaliy baza vazifasini bajaradi. Hududdagi muassasalarning 4 ming 300 nafar o‘quvchisi bu yerdagi ustaxona va laboratoriyalarda amaliyot o‘taydi.

Kasblar shaharchasida transport va logistika, sanoat va qurilish, servis, qishloq xo‘jaligi hamda «yashil» energetika kabi talab yuqori bo‘lgan yo‘nalishlar qamrab olingan. «O‘zing yasab ko‘r» tamoyili asosida yoshlarga amaliy ko‘nikmalar berilmoqda.

Prezident mahalliy xomashyoni chuqur qayta ishlash, yuqori qo‘shilgan qiymatli mahsulotlar ishlab chiqarishni ko‘paytirish va korxonalarni xomashyo bilan barqaror ta’minlash muhimligini ta’kidladi.

Shuningdek, kasbiy ta’limni ish beruvchilar ehtiyojiga moslashtirish va tajribani boshqa hududlarga kengaytirish bo‘yicha ko‘rsatmalar berildi.