Tesla Yevropada keskin tanazzulda: Fransiyada sotuvlar −58 foiz, Daniyada −49

Yevropaning elektromobillar bozorida raqobat kuchayishi Tesla uchun og‘ir oqibatlarga olib kelmoqda. Fransiyada 2025 yil noyabr oyida kompaniya sotuvlari keskin — 57,83 foizga pasayib, bor-yo‘g‘i 1591 dona avtomobil ro‘yxatdan o‘tdi. Bu haqda Investing nashri Fransiya avtomobilistlar federatsiyasi ma’lumotlariga tayanib xabar berdi.

Yil boshidan buyongi natijalar ham xursand qilarli emas: yanvar–noyabr oralig‘ida Teslaʼning Fransiyadagi savdolari 32,79 foizga qisqardi. Fransiyaning umumiy avtomobil bozori ham pasaygan, biroq ancha yumshoq sur’atda — 4,92 foiz. Bir qarashda, bu umumiy bozordagi inersiyadek ko‘rinsa-da, raqamlar Tesla uchun alohida muammo mavjudligini anglatadi.

Benzin va hibrid modellari ulushi kengayayotgan bir paytda, Yevropa avtoishlab chiqaruvchilari tomonidan taqdim etilgan yangi elektromobil modellari bozorda jiddiy raqobat yaratmoqda. Teslaning Yevropa miqyosidagi imiji esa yil davomida zaiflashgan: jamoatchilik Ilon Maskning bayonotlari va siyosiy chiqishlarini salbiy qabul qilmoqda, bu esa brendning ommaviy qabul qilinishini susaytirgani aytiladi.

Shu bilan birga, Daniyada ham o‘xshash manzara kuzatilmoqda. Daniyaning bilstatistik.dk portali ma’lumotlariga ko‘ra, noyabr oyida Tesla ro‘yxatdan o‘tkazgan yangi avtomobillar soni 49 foizga qisqardi: o‘tgan yilning shu oyidagi ko‘rsatkichga nisbatan atigi 534 ta avtomobil qayd etilgan. Bu mamlakatdagi talabning keskin susayganini anglatadi.

Yevropaning boshqa qismlarida ham pasayish tendensiyasi saqlanmoqda: sentabr oyida Yevropa Ittifoqi, YeAST va Britaniyadagi ro‘yxatdan o‘tkazish natijalari 10,5 foizga kamaygan edi.

Tesla sentabr oyi kvartalida rekord darajada yetkazib berish ko‘rsatkichlariga erishgan bo‘lsa-da, ekspertlar buni AQSHda soliq imtiyozlari muddati tugashi oldidan xaridlarning sun’iy tezlashuvi bilan izohlaydi. Kompaniyaning III chorak moliyaviy natijalari ham bozorni qoniqtirmadi: SI va robototexnikaga o‘tish jarayoni marja foydasini yanada qisartirgan.

Avvalroq Mercedes Tesla’ni qiyin ahvolga soladigan yangi elektr sedanini chiqargani haqida xabar bergan