Трамп бир қўнғироқ билан ФИФАнинг қарорини ўзгартирди: Балогун Белгияга қарши ўйнайди

ФИФА АҚШ терма жамоаси ҳужумчиси Фоларин Балогуннинг дисквалификациясини вақтинча тўхтатиб, унга Жаҳон чемпионати 1/8 финалида Белгияга қарши ўйнашга рухсат берди. Қарор АҚШ президенти Доналд Трампнинг ФИФА раҳбари Жанни Инфантино билан телефон суҳбатидан кейин қабул қилингани айтилмоқда.

Балогун Босния устидан 2:0 ҳисобида қозонилган ғалабада мусобақадаги учинчи голини урди, бироқ иккинчи бўлимда рақиби Тарик Муҳарремовичнинг тўпиғига бутсаси билан зарба бергани учун қизил карточка олган эди. 25 ёшли ҳужумчи VAR такрорий лавҳасидан сўнг майдондан четлатилган.

Суҳбатдан хабардор манбаларга кўра, Трамп Инфантинога қўнғироқ қилган ва жаҳон футболининг бошқарув органидан четлатиш қарорини қайта кўриб чиқишни сўраган. Шу тариқа, ФИФА қизил карточкани бутунлай бекор қилмаган ҳолда, Балогунга ўйинда иштирок этиш учун рухсат бермоқда.

«ФИФА Интизом кодексининг 27-моддасига мувофиқ, ўйиндан четлатиш жазосининг ижроси бир йиллик синов муддатига тўхтатиб турилади», — дейилади ташкилот баёнотида.

Маълумот учун, Интизом органи жазо ижросини тўлиқ ёки қисман тўхтатиб туриш ваколатига эга.

«Улкан адолатсизлик»

«Тўғри қарор қабул қилгани ва улкан адолатсизликни бартараф этгани учун ФИФАга раҳмат», — деб ёзди Трамп ўзининг «Truth Social» тармоғидаги саҳифасида.

Оқ уй эса Балогуннинг таркибга қайтарилганини Х тармоғида «АҚШ-АҚШ-АҚШ» (USA-USA-USA) дея нишонлади.

АҚШ терма жамоаси футболчилари қарорни ижобий қабул қилган. Жамоа етакчиларидан Кристиан Пулишич дастлаб хабарга ишонмаганини, кейин эса буни «жуда яхши янгилик» сифатида қабул қилганини айтди.

Белгия қарордан норози

Белгия Қироллик футбол ассоциацияси ФИФАнинг қароридан «ҳайратда» эканини билдирди.

«ФИФА ўз қарорини ФИФА Интизом кодексининг 27-моддасига асосланиб қабул қилган. Бу қоидага кўра, ФИФА Интизом қўмитаси аввалроқ тайинланган интизомий жазонинг ижросини тўхтатиб туриш тўғрисида қарор қабул қилиши мумкин. Бироқ худди шу кодекснинг 66.4-моддасида қизил карточка (четлатиш) автоматик равишда жамоанинг навбатдаги ўйинидан четлатилишига олиб келиши аниқ кўрсатилган. Мазкур Жаҳон чемпионати давомида берилган барча олдинги қизил карточкаларда айнан шу қоида ишлаган», — дейилади Ассоциация баёнотида.

Таъкидланишича, мазкур қарор турнир регламентига мутлақо зид.

«10.5-моддада белгиланганидек: Агар футболчи ёки жамоанинг расмий шахси тўғридан-тўғри ёки билвосита қизил карточка (иккинчи огоҳлантириш) натижасида майдондан четлатилса, у автоматик равишда ўз жамоасининг кейинги ўйинини ўтказиб юборади», — дея қўшимча қилган Белгия томони.

Бундай ҳолатлар аввал ҳам кузатилган

Португалия терма жамоаси сардори ўтган йили Ирландияга қарши кечган саралаш босқичининг сўнгги турларидан бирида майдондан четлатилган эди. ФИФА унинг уч ўйинлик дисквалификациясининг охирги иккитасини вақтинча тўхтатиб тургани сабабли, ҳужумчи Жаҳон чемпионатининг дастлабки баҳсларида иштирок этиш имконига эга бўлган.

1962 йилда Бразилиянинг афсонавий футболчиси Гарринча ярим финалда майдондан четлатилган, бироқ чилилик мухлислар ва президент Хорхе Алессандри томонидан қўллаб-қувватланган муваффақиятли апелляциядан сўнг финалда ўйнаш ҳуқуқини қўлга киритган ҳамда ўз жамоасининг Чехословакия устидан 3:1 ҳисобида ғалаба қозонишига ёрдам берган эди.