O‘zbekiston logistika muammolari uchun maxsus shtab tashkil qildi

Yaqin Sharqda geosiyosiy vaziyat keskinlashgan bir paytda O‘zbekiston tashqi savdo yuklarini uzluksiz yetkazishni ta’minlash uchun shoshilinch choralar ko‘rmoqda. Transport vaziri Ilhom Mahkamov «O‘zbekiston 24» telekanaliga bergan intervyusida bu maqsadda maxsus shtab tashkil etilganini ma’lum qildi. Prezident Shavkat Mirziyoyev 23 iyun kuni bo‘lib o‘tgan yig‘ilishda tashqi savdo yo‘nalishlarini qayta ko‘rib chiqish va yuklarni xavfsiz portlarga yo‘naltirish zarurligini ta’kidlagan. Mahkamovga ko‘ra, ushbu o‘zgarishlar yuk tashish xarajatlarini 30 foizgacha oshirishi mumkin. Vazirning so‘zlariga ko‘ra, O‘zbekistonning xalqaro yuk tashuvlari asosan to‘qqizta yo‘lak orqali amalga oshiriladi. Ular orasida Eron orqali o‘tadigan Janubiy koridor eng muhimlardan biri bo‘lib, mamlakat import va eksportining 60 foiziga yaqini shu yo‘lakka to‘g‘ri keladi. Ammo Yaqin Sharqdagi ziddiyatlar ushbu yo‘nalishda jiddiy muammolar keltirib chiqarishi mumkin. Shu munosabat bilan, prezident topshirig‘iga ko‘ra, Transport vazirligi huzurida ishchi guruh tuzildi. Bu guruh 24 soatlik ish rejimida yuklarning chegaralarda yoki portlarda turib qolishining oldini olish, sun’iy narx oshishlariga yo‘l qo‘ymaslik va logistika muammolarini tezkor hal etish bilan shug‘ullanadi. Shtab Transport vazirligi binosida joylashadi. 24 iyundan boshlab 1167 qisqa raqami va maxsus Telegram boti orqali yuk tashishdagi muammolar haqida xabar berish imkoni yaratildi. Shuningdek, logistika jarayonlarini real vaqtda kuzatish uchun yagona elektron platforma ishlab chiqilmoqda. Shtab tarkibiga Tashqi ishlar vazirligi, Bojxona qo‘mitasi, Investitsiyalar va tashqi savdo vazirligi, Savdo-sanoat palatasi va AIRCUZ kabi tashkilotlar vakillari kiritilgan. Ilhom Mahkamovning ta’kidlashicha, agar Eron orqali yuk tashishda muammolar yuzaga kelsa, Pokiston portlari, Turkiyadan o‘tadigan O‘rta koridor yoki Gruziya-Rossiya chegarasi orqali Rossiya va Qozog‘iston yo‘nalishlaridan foydalanish imkoniyati mavjud. Har bir xalqaro yo‘lak uchun ikki-uchta muqobil yo‘nalish tayyorlanmoqda.