O‘zbekistonning Saudiyadagi elchixonasi vatandoshlarni parvozlardagi o‘zgarishlardan ogohlantirdi
Diplomatik vakolatxona mintaqadagi keskinlik sabab aviareyslar jadvali, parvoz yo‘nalishlari va tranzit qoidalari o‘zgarishi mumkinligini ma’lum qildi.
O‘zbekiston fuqarolari mintaqadagi keskinlik sababli parvozlar jadvalidagi ehtimoliy o‘zgarishlarni hisobga olishga va xavfsizlik qoidalariga qat’iy rioya qilishga chaqirildi. Bu haqda O‘zbekistonning Saudiya Arabistonidagi elchixonasi rasmiy murojaatiga tayanib, «Dunyo» axborot agentligi ma’lum qildi.
Saudiya Arabistoni hududida ichki vaziyat barqarorligicha qolmoqda. Mamlakatda jamoat xavfsizligiga tahdidlar yoki maxsus cheklov choralari qayd etilmagan.
Diplomatik vakolatxona ma’lumotlariga ko‘ra, shunga qaramay, mintaqada saqlanib qolayotgan umumiy vaziyatdan kelib chiqqan holda, parvozlar logistikasi, tranzit yo‘nalishlari va kutish vaqtlarida o‘zgarishlar yuzaga kelishi mumkin. Bunday holatlar safar shartlari va uning davomiyligiga ta’sir ko‘rsatishi, xususan, parvozlarning kechikishi, yo‘lovchilarni majburiy ravishda boshqa reysga o‘tkazish yoki parvoz yo‘nalishining o‘zgarishiga olib kelishi ehtimoli mavjud.
«Mintaqada saqlanib qolayotgan keskinlik hamda havo qatnovlari faoliyatida davriy ravishda yuzaga kelayotgan o‘zgarishlarni inobatga olgan holda, xorijiy davlatlarga safarlarni rejalashtirishda aviareyslar jadvali, parvoz yo‘nalishlari va tranzit qoidalariga kiritilishi mumkin bo‘lgan o‘zgarishlarni hisobga olishingizni so‘raymiz», — deyiladi elchixona murojaatida.
Xavfsizlik talablari va taqiqlar
Elchixona Saudiya Arabistonida bo‘lib turgan yoki ushbu mamlakatga borishni rejalashtirayotgan o‘zbekistonliklar uchun qator qat’iy tavsiyalarni ishlab chiqqan. Unga ko‘ra, fuqarolardan quyidagilarga amal qilish talab etiladi:
• Saudiya Arabistoni va Yaman o‘rtasidagi chegara hududlariga yaqinlashmaslik;
• Xavfsizlik masalalari bo‘yicha mahalliy hokimiyat organlarining ko‘rsatmalariga qat’iy rioya qilish;
• Harbiy obyektlar va turli hodisalar oqibatlarini tasvirga olmaslik;
• Tekshirilmagan ma’lumotlarni tarqatmaslik va faqat rasmiy axborot manbalaridan foydalanish;
• Shaxsni tasdiqlovchi hujjatlarni doimo o‘zi bilan olib yurish.
«Barchani ehtiyotkorlikka rioya qilish hamda tinchlik va xavfsizlik qoidalariga qat’iy amal qilishga chaqiramiz», — deya qo‘shimcha qilingan xabarda.
Diplomatik vakolatxonalar bilan aloqa
Elchixona zarur hollarda O‘zbekistonning Saudiya Arabistonidagi diplomatik vakolatxonalari bilan bog‘lanish imkoniyati mavjudligini eslatib o‘tgan.
Murojaat uchun aloqa vositalari:
O‘zbekistonning Ar-Riyoddagi elchixonasi:
Telefon: +966 11 263 52 23 (Konsul: Shuxrat Ibragimov)
Telegram / WhatsApp: +966 56 721 77 31
O‘zbekistonning Jiddadagi Bosh konsulxonasi:
Telefon: +966 12 607 72 50 (Konsul: Azimjon Kobiljonov)
Telegram / WhatsApp: +966 59 439 08 50
Mintaqada nima bo‘lmoqda?
Saudiya Arabistonidagi aviaqatnovlarga ta’sir qilayotgan vaziyat Yamandagi qurolli mojaro va Yaman hududida faoliyat yuritayotgan husiylar guruhining Saudiya Arabistoniga hujumlari bilan bog‘liq. 2026 yil oktabr oyi boshida husiylar va Saudiya Arabistoni qo‘llab-quvvatlayotgan Yaman hukumati kuchlari o‘rtasidagi to‘qnashuvlar yanada kuchaydi. Husiylar Saudiya Arabistonining aeroportlari va boshqa infratuzilma obyektlariga zarbalar berganini ma’lum qildi. Saudiya tomoni esa hujumlarga javoban Yamandagi husiylar pozitsiyalariga havo zarbalarini berdi. Bu harakatlar mintaqadagi harbiy keskinlikni yanada oshirdi.
Riyod aeroportiga hujum va parvozlardagi o‘zgarishlar
8-oktabr kuni Saudiya Arabistoni poytaxti Riyoddagi Xalid qirol nomidagi xalqaro aeroport hududi va Saudi Airlines aviakompaniyasi samolyotiga hujum qilindi. Saudiya fuqarolik aviatsiyasi organining 9-oktabrdagi ma’lumotiga ko‘ra, hodisa oqibatida uch nafar Saudiya fuqarosi halok bo‘lgan, bir necha kishi jarohatlangan. Halok bo‘lganlar orasida aviakompaniya xodimi ham bor. Samolyotga ham moddiy zarar yetgan. Husiylar aeroportga ballistik raketa bilan hujum qilganini bildirgan.
Hodisa aviaqatnovlarda jiddiy uzilishlarga sabab bo‘ldi. Associated Press agentligining 9-oktabrdagi xabariga ko‘ra, shu kunning ikkinchi yarmiga qadar Riyodga va u yerdan amalga oshiriladigan kamida 124 ta reys bekor qilingan, bir kun avval esa yana yuzlab reyslar bekor qilingan edi.
Air India aviakompaniyasi Riyodga parvozlarini 10-oktabrgacha to‘xtatganini bildirgan. Lufthansa Group tarkibidagi aviakompaniyalar esa Riyodga reyslarini 16-oktabrgacha to‘xtatishini ma’lum qilgan. Pakistan International Airlines ham Saudiya poytaxtiga parvozlarni to‘xtatgan.
