«Semurg Insurance» суғурта компаниясининг лицензияси вақтинча тўхтатилди
Регулятор қарорига кўра, компания янги шартномалар тузиш ҳуқуқидан маҳрум этилди ва камчиликларни бартараф этиши шарт.
© Фото: spot.uz Истиқболли лойиҳалар миллий агентлиги «Semurg Insurance» суғурта компаниясига берилган лицензия амал қилишини вақтинча тўхтатганини маълум қилди. Қарор натижасида компания эндиликда янги суғурта ва қайта суғурта шартномаларини тузиши, шунингдек, амалдаги шартномаларни узайтириши мумкин эмас.
Маълум қилинишича, «Semurg Insurance»га суғурта фаолиятини амалга ошириш учун 2025 йил 7 октябрда 1081744-сонли лицензия берилган. Аммо аниқланган қонунбузарликлар ва регулятор талабларига тўлиқ риоя этилмагани сабабли мазкур лицензиянинг амал қилиши вақтинча тўхтатилди. Бу даврда компанияга суғурта бозорида фаол операцияларни кенгайтириш тақиқланади.
Шу билан бирга, агентлик қарорида «Semurg Insurance» илгари тузилган суғурта шартномалари бўйича ўз зиммасига олган мажбуриятларни белгиланган тартибда тўлиқ бажариши шартлиги алоҳида қайд этилган. Яъни лицензия тўхтатилиши мижозлар олдидаги мавжуд мажбуриятларни бекор қилмайди.
Регулятор шунингдек, лицензияси тўхтатилган барча суғурта ташкилотларига камчиликлар тўлиқ бартараф этилмагунча янги шартномалар тузмасликни тавсия қилди. Бу чора бозорда шаффофлик ва мижозлар манфаатларини ҳимоя қилишни кучайтиришга қаратилган.
Маълумотларга кўра, 2024 йил кузида Истиқболли лойиҳалар миллий агентлиги «Semurg Insurance»ни 31,5 миллион сўм жаримага тортган эди. 2025 йил октябрида эса компания лицензиясининг мажбурий суғурта фаолиятини амалга ошириш қисми бекор қилинган. Шундан сўнг лицензия умумий суғурта соҳасида фақат ихтиёрий суғурта фаолиятини амалга ошириш учун қайта расмийлаштирилган эди.
