AQSH Venesuela neftidan 500 mln dollar daromad oldi

AQSH ma’muriyati Venesuela neftining ilk partiyasini sotishdan 500 million dollar daromad oldi. Bu kelishuv Vashingtonning Venesueladagi yangi siyosiy va iqtisodiy boshqaruvi doirasida amalga oshirilgan birinchi yirik moliyaviy operatsiya sifatida baholanmoqda. Mazkur jarayon AQSH tomonidan sobiq prezident Nikolas Maduro hokimiyatdan chetlatilganidan 11 kun o‘tib amalga oshirildi.

Prezident Donald Tramp Venesuela neft salohiyatini vaqtinchalik AQSH nazorati ostida boshqarish rejasini ochiq aytgan. Ushbu rejaga ko‘ra, 50 million barrelgacha neft sotilib, tushumlar keyinchalik Venesuelaga qaytarilishi kerak. Shu maqsadda juma kuni imzolangan farmon neft savdosidan tushgan mablag‘larni xalqaro kreditorlar va sud da’volaridan himoya qilishni nazarda tutadi.

Ma’muriyat ma’lumotlariga ko‘ra, neft savdosidan tushgan mablag‘lar hozircha AQSH hukumati nazoratidagi bank hisoblarida saqlanmoqda. Asosiy hisob raqami Qatarda joylashgan. Bu davlat neytral moliyaviy hudud sifatida tanlangan bo‘lib, mablag‘larni musodara qilish xavfini kamaytiradi.

Venesuela qarzdorligi 170 milliard dollargacha yetishi sababli, xorijiy kompaniyalar infratuzilmani tiklashda ehtiyotkorlik bilan yondashmoqda. Shu bilan birga, Chevron kompaniyasi yaqin ikki yil ichida ishlab chiqarishni 50 foizga oshirish imkoniyati borligini bildirgan.

AQSH moliya vaziri Skott Bessent tushumlarni nazorat qilish va ularni Venesuelaga yo‘naltirish Moliya vazirligi vakolatida ekanini ta’kidladi. Demokratlar esa ofshor hisoblardan foydalanish qonuniyligi yuzasidan jiddiy savollar ko‘tarmoqda.