Tramp Eronda qatllar to‘xtatilganini xabar qildi
Unga ko‘ra, 14-yanvar Eronda qatl kuni bo‘lishi kerak edi.
AQSH prezidenti Donald Tramp Eron rasmiylari hukumatga qarshi norozilik namoyishlari ishtirokchilarini qatl etish niyatida emasligini ma’lum qildi. Bu haqda NBC News xabar berdi.
Tramp Oq uyning Oval kabinetida so‘zga chiqib, AQSH «Eronda qotilliklar to‘xtayotganidan» xabar topganini aytdi.
«Ular to‘xtadi. Ular to‘xtamoqda va hech qanday qatl etishlar rejalashtirilmayapti. Menga ishonchli manbalardan shunday ma’lumot berishdi. Ishonchim komilki, agar bu [qatllar] sodir bo‘lsa, barchamiz juda xafa bo‘lamiz. Ular so‘nggi bir necha kun ichida ko‘pchilik gapirgan qatlni amalga oshirishmaydi. Bugun qatl kuni bo‘lishi kerak edi», - dedi Tramp maktablardagi sutga oid qonunni imzolash chog‘ida.
Tramp, agar mamlakatda qatllar bo‘lib o‘tsa, AQSH Eronga qarshi «juda qat’iy choralar» ko‘rishidan ogohlantirdi.
Donald Tramp avvalroq Erondagi hukumatga qarshi namoyishlar ishtirokchilarining o‘ldirilishini qoralagan edi. Huquq himoyachilarining ma’lumotlariga ko‘ra, namoyishlar davomida 2500 dan ortiq kishi halok bo‘lgan.
Avvalroq, Islom Respublikasi tashqi ishlar vaziri Abbos Arakchi Eron rasmiylari norozilik namoyishlari ishtirokchilarini osish orqali qatl etish niyatida emasligini, bunday harakat varianti hatto ko‘rib chiqilmayotganini ma’lum qilgan edi.
«Osish haqida gap ham bo‘lishi mumkin emas. Bu AQSH prezidenti Donald Trampni ushbu jarayonga jalb qilish uchun boshlangan dezinformatsiya kampaniyasining elementlaridan biri bo‘lib, bu falokatli oqibatlarga olib kelishi mumkin», - dedi Arakchi Fox News telekanaliga bergan intervyusida.
Tashqi siyosat idorasi rahbari hozirda Eronda «namoyishlar va protestlar yo‘qligini», mamlakatda osoyishtalik o‘rnatilganini ta’kidladi.
